Minerva chelh turin Churchill Brothers?

Vawiin tlai dar 5:30-ah Churchill Brothers chuan hmahruaitu Minerva Punjab an mikhual dawn a, team dinhmun a in ang lo hle–Goan club-in season thar atana him tumin an bei ang a, Minerva-in champion kalkawng zawh zel tumin an bei thung ang.

Minerva-in match sarih khelh tur an la neih aṭangin vawi nga hnehna an chang thei a nih chuan ban phak rual lohin an champion dawn tihna a ni a, anmahni hnaihtu Neroca leh East Bengal tan pawh umphak theih an ni tawh dawn lo.

Churchill erawh Gokulam Kerala leh Chennai City te nen point 10 ṭheuh an neih avangin tla thei dinhmunah an la ding reng a, hmun him lam pan turin hnehna chan an mamawh–champion duh Neroca leh East Bengal ten Goan club an ṭan ang.

Minerva chu...
Season hmasa I League-ah Minerva Punjab chu a tikimtu zing ami mai an ni a, tun season-ah erawh Manipur coach Khogen Singh hnuaiah team hlauhawm an ni a, champion nomawi hnaih ber an ni mek.

Minerva chet ṭhat chhanah an foreigner lak fuh chu sawi lan loh harsa a ni – Chencho Gyeltshen thiamzia inhrilh nawn a ngai tawh lo a, Bhutan international hian goal ruk a khung tawh. Chencho pui tura an neih William Opoku lah Middlesbrough player hlui a ni a, kum 20 mi chauh a la nih bawk avangin I League-ah a nung vet vet hle.

Punjab club buaina tur erawh an tlarhnung a ni–East Bengal laka goal hnih an khung hnuah Kolkata club hi an si phurh an sut zawh tir a, harhna chang thar Churchill laka goal chhuah lo turin Khogen-a’n ngaihtuahna thar a sen a ṭul ang.

Harhna nen Churchill
An match hmasa pangaah Churchill Brothers an tlawm fai vek a, January transfer-ah player an lak fuh avangin an match hnuhnung pangaah erawh vawi khat chiah an tlawm–Goan club ṭantute tana thu hriat nuam lo tur erawh an tlawm awmchhun hi an match hnuhnung bera Neroca an hneh loh kha a ni.

Red Machine (Churchill sawina) coach Alfred Fernandes-a’n match hnih chhung a zawnin starting eleven ngai a hmang tawh a, a zawnin a match thum nan a hman a rinawm loh–Nicholas Fernandes leh Israil Gurung ten inkhel bul an ṭan tawh a beiseiawm.

Oman Professional League top scorer hlui Mechac Koffi-a’n I League a season hmasa berah a zia a chhuah nghal a, Gambia U17 international hlui Dawda Ceesay-a’n Africa U17 Cup of Nations nomawi an chawi ṭum leh 2009 FIFA U17 World Cup an khelh ṭuma player pawimawh a nih chhan a pholang tawh a, Ogba Kalu lah I League-ah a tlangnel ngaiin a la tlangnel reng bawk–Minerva tan anni pathum hi ven bik a ṭul ang.