Pune khelmualah Kerala Blasters

Zanin dar 8:00-ah Indian Super League inkhel pakhat a awm dawn a, Pune City chuan David James hnuaia harhtharna chang mek Kerala Blasters an mikhual ang.

Pune City hian an match hnuhnung pahnihah goal nga khungin goal khat chiah an chhuah a, zaninah inrintawkna nen Blasters an mikhual dawn.

Maharashtra club hian table-ah pathumna dinhmun luah mekin semifinal khel thei dinhmunah an ding mek a, mah se an hnuai chiaha awm FC Goa hian point thum chauha thlaua match khata an khelh tlem zawk bawk avangin an dinhmun a la him bik lo–match khat chetsuala dinmun la phet thei reng an ni.

Kerala Blasters-in Manchester United assistant manager hlui Rene Meulensteen enkawlna hnuaiah match sarih khelin point ruk chiah an hlawh chhuak thei a, David James an neih hnuah erawh match ruk aṭangin point 10 an nei thung–zaninah Pune hneh tumin an khel ang.

Rene enkawlna hnuaia hmun pawimawh chang Blasters defender Lalruatthara’n David James hnuaiah pawh hmun pawimawh a chang a, Pune tan Lalchhuanmawia Fanai leh Isaac Vanmalsawma ten hmun pawimawh an chang ṭhin bawk.