January bazar a lun

Ṭum dang zawng aiin Premier League January transfer bazar a lun a, 'Big Six' huang chhunga club lian mai bakah mahni phak tawk ṭheuhah Premier League club an che 'na' hlawm hle.

Magpiesh-ah Slimani: Newcastle United chuan Leicester City forward Islam Slimani leh Sparta Prague goalkeeper Martin Dubravka te chu season tawp thleng an hnena khel turin loan-in an lalut. Slimani hian August 2016 khan pound maktaduai 29-in Foxes a zawm a, tun season-ah erawh league match hnihah chiah inkhel bul a la ṭan.

Palace-ah Norway striker: Crystal Palace chuan Danish club FC Midtjylland aṭangin Alexander Sorloth chu pound maktaduai kuain an lalut a, kum li leh a chanve chhung atan contract an ziahpui. Kum 22 mi striker hian tun season-a match 26 a khelhah goal 15 a khung tawh.

Hammers zawmtu Hugill: West Ham chuan Preston North End aṭangin pound maktaduai 10 man Jordan Hugill an lalut. Kum 25 mi striker hian Preston tan match 114-a khelhah goal 30 a khung.

Swansea-ah Ayew a kir: August 2016-a Swansea City aṭanga West Ham zawmtu Andre Ayew chu Welsh club lamah a kir leh a, a man zat hi pound maktaduai 18 niin 20 thlenga kaisang thei tur a ni. Swans player manto ber hian kum thum leh a chanve chhung atan contract a ziak. Swansea hian Leicester City midfielder Andy King chu season tawp thleng atan loan-in an hawh bawk.

Stoke player thar Ndiaye: Stoke City chuan Senegal midfielder Badou Ndiaye chu Galatasaray aṭangin pound maktaduai 14-in an lalut a, kum li leh a chanve chhung atan contract an ziahpui.

China lamah Ighalo: Watford chuan Nigeria striker Odion Ighalo chu Chinese Super League club Changchun Yatai hnenah pound maktaduai 20-in an hralh. Kum 2015-a match 38 aṭanga goal 30 khung thei striker hian tun season-ah league goal khat chiah a la khung a, inelna hrang hrangah match 15 chhung goal a khung tawh lo.

Watford-ah Ndong: Sunderland midfielder Didier Ndong chuan season tawp thleng khel turin Watford chu loan-in a zawm a, season tawpah a nghetin a lut thei ang. Watford hian Sweden Under-21 goalkeeper Pontus Dahlberg chu kum nga leh a chanve chhung atan IFK Gothenburg aṭangin an lalut bawk a, season tawp thleng atan a club-ah hian loan-in an kaltir nghal. Watford forward Isaac Success chuan Malaga chu loan-in a zawm ve thung.

Mangala-a'n Everton a zawm: Manchester City defender Eliaquim Mangala chuan season tawp thleng loan-a khel turin Everton a zawm.