Man United leh Ighalo te an vul

Europa League last 16 first leg-ah Manchester United-in 5-0 zetin LASK an hneh a, minute 90 khelh tur la awm chungin Ole Gunnar Solskjaer hote hi quarterfinal an thlengah a ngaih theih. Inkhel dangah Wolverhampton Wanderers-in khualmualah Olympiakos Piraeus 1-1 in an chelh a, Wolves tan nomawi beiseina a la nung zel.

Linzer Stadion-ah United tan Odion Ighalo-a'n pui zetin goal hmahruai a khung a; Daniel James, Juan Mata, Mason Greenwood leh Andreas Pereira ten goal khat ṭheuh an khung. LASK boss Valerien Ismael chuan, "Europa League zinkawng chu a tawp ta," tiin inkhelh banah beisei an neih tawh loh thu a sawi.

Coronavirus vangin inkhel entu an awm lo a, heti chung hian United player-te'n inelna an la thu tak hle. United manager Solskjaer chuan, "Warm up neih zawhah Michael Carrick leh Kieran McKenna te ka bulah an rawn kal a, player-ten warm upa an tih ṭhat thu min hrilh. An rilru an pe a, ka lawm," tiin inkhelh banah a sawi a, hei hian inkhel kalhmang a sawifiah.

Manchester United leh an khingpui LASK hi khaikhin rual a ni lo a, amaherawhchu football-ah erawh engpawh a thleng thei lo. United-in Anthony Martial an chhawr theih loh avangin Nigerian striker Odion Ighalo-a'n inkhel bul a ṭan a, goal hmahruai a khung zui bawk.

United game siamtu Bruno Fernandes ball pek chu Odion Ighalo-a'n box pawnah amah vengtu bum nan vawi thum a sep a, a vawi linaah kawh zetin ke vei lamin a pet goal. Nigerian striker hian match thum inkhel bul a 

ṭanah goal li a khung a, Romelu Lukaku hnua hetiang record chelh leh theih hmasa ber a ni.

Solskjaer hoten Ighalo an la fuh a, loan hmanga an lak a nih miau avangin lak ngheh dan an zawng ang. Watford striker hluiin fak a phu a, Bruno Fernandes hming lam hmaih theih a ni lo. Portuguese midfielder hian tun season Europa League-ah goal 10-ah a inrawlh tawh a, Sporting leh United tan goal ruk khungin vawi li assist a tawh.

Solskjaer-a'n Manchester derby aṭangin player panga a thlak chungin an khel ṭha a, first half-a goal hmaa vannei tawk lo Daniel James-a'n minute 58-naah a khung. Welsh winger hian nikum August 31 hnuah goal a khung chauh a, goal a khung theih nan hian Ighalo-a'n tha a thawh hlawk hle.

United tana chanchin ṭha hriat tur a awm belh zel a, Fred-a'n hma a sawn zel. Brazilian midfielder hian minute 82-naah Juan Mata goal khung tur a siamsak a, injury time-ah Mason Greenwood leh Andreas Pereira ten an khung belh. Greenwood hian tun season Europa League-ah goal nga a khung a, United teenager zinga European competition season khata goal khung tam ber record a siam.

Manchester United manager Ole Gunnar Solskjaer chuan, "Ka naute ka chhuang hle. An khelh chhuah danah khan fakna tur a tam a, goal hmaah an hriam bawk avangin dinhmun ṭha takah kan ding," tiin a naute a fak.

LASK manager Valerien Ismael chuan, "Manchester United theihna kan hmu a, kan inthlau hret a ni. Chutihrualin kan tan chuan inzirna zel a ni thung," tiin a khingpui a fak.

United ṭantu 700-in ticket an lei hman a, en tumin zin hial mah se an en thei lo. English club hian anmahni ṭantute senso phu hruk nan hian mimal tin hnenah £350 an pe let a, hei vang hian United-in fan te hmakhua an ngaih avangin £245,000 an seng dawn tihna a ni.

Wolverhampton Wanderers-in coronavirus hlauh vangin UEFA hnenah Olympiakos nena inkhelh hun sawn an dil a, an phalsak loh avangin an inkhel ta tho. 

Minute 28-na lekah Olympiakos player Borges Semedo hnawhchhuah a nih avangin Wolves dinhmun a ṭha angin a lang a amaherawhchu player 10-a khel Greek club-in goal an khung hmasa zawk. Karaiskakis Stadium-ah mualneitu tan Youssef El Arabi-a'n minute 54-naah a khung a, Arsenal pet thlatu Olympiakos dinhmun a ṭha ta zawk.

Wolves-in chhantu an mamawh a, minute 67-naah Neto rawn pen chhuakin freekick aṭangin siphurh sutna goal a khung. Wolves boss Nuno Espirito Santo chuan, "Bul kan ṭan aṭang khan khelh a harsa em em a, inkhel a nung lo. Football inkhel hmuhnawm tih tur a ni lo a, inkhel erawh kan thunun. Goal khung kan harsat a ni," tiin entu awm loa inkhel a harsat thu a sawi.