Arsenal tan Aubameyang a chiang rih lo

Zanin dar 11:00 hian Arsenal chuan Everton an mikhual dawn a, Gunners player manto ber Pierre-Emerick Aubameyang-a'n a club thar tana a match hmasa ber a khel dawn em tih a chiang thei rih lo a, Arsene Wenger chuan Henrikh Mkhitaryan erawhin bul a ṭan dawn thung tih a sawi.

Aubameyang leh Henrikh Mkhitaryan tan Emirates Stadium-a an match hmasa ber tur a nih theih laiin, Everton forward thar Theo Walcott tan erawh a club hlui a hmachhawnna hmasa ber tur a ni dawn thung–English forward tan thawnthu kalhmang a danglam ta.

Arsenal manager Arsene Wenger chuan, "Player ṭha tan pawh Premier League hi chu chona hautak a ni ṭhin a, Aubameyang tan pawh a awlsam lo mai thei. Ani hian kan khelh dan phung a ngainain a thiam chi a ni a, Dortmund lama a ṭhianpa nen ṭha taka an inkawp chhoh theih ka beisei," a ti.

Number 14
Arsenal tana goal khung hnem ber Thierry Henry khan jersey number 14 a ha ṭhin a, chumi hnuah Walcott-a'n a ha zui leh; tuna Arsenal jersey number 14 ha tur chu pound maktaduai 56 man Aubameyang a ni.

Kum 28 mi hian Borussia Dortmund tan season kal laiah goal 21 a khung tawh, Ningani khan London Colney-ah mimalin training neih ṭan tir a ni tawh a, zanina a inkhelh leh khelh loh chu Arsene Wenger kutah a awm.

Dortmund tana Auba khelhpui ṭhin Mkhitaryan-a'n Swansea City lakah match hmasa ber a khel tawh a, a club thar hi a chak pui zo lo. Bundesliga star hlui pahnihte hi an inkawp fuh chho leh a nih chuan Premier League club dang tlarhnung tana ven harsa tak tur an ni ang.

Arsenal striker thar Aubameyang chuan, "Khawvel club ropui berte zinga mi ka zawm thei hi ka lawm a, a bik takin Henrikh Mkhitaryan nen kan awmdun leh thei hian min ti hlim a ni," a ti, Auba hian Gunners legend Henry-a jersey number a chhawm thei chu a lawm thu a sawi bawk.

Mkhitaryan leh Auba te Dortmund tana an khelh dun hnuhnun ber chu 2015-16 season kha a ni a, an pahniha an goal thun belhkhawm chu 59 niin, ṭhiante goal khung tur vawi 31 zet an siamsak bawk.

Beiseina
Alexis Sanchez chhuah hnuah Mkhitaryan leh Aubameyang ten Arsenal an zawm a, season tawp ruala contract tawp ve tawh tur Mesut Ozil-a'n a contract chu kum thum leh a chanve atan a pawt sei bawk. Player thar pahnih leh Germany international Ozil hian club chhungah phurna leh beiseina thar a siam ngei rin a ni.

Premier League-a parukna ni lai Arsenal hi palina Chelsea aiin point riat zetin an hniam tawh zawk a, season thara Champions League khelh an duh a nih chuan chetsual a hun tawh lo hle.

Tun hnai thla 12 chhung zet chu Arsenal hian an khelmualah record an nei ṭha hle, league match bikah chuan Manchester United chiah an hneh lo, khualmuala beisei phak lo team hian anmahni khelmualah point thum hmuh an tum ruh dawn a, an tan draw pawh result ṭha a tling zo tawh lo ang.

Walcott a kir dawn
England international Walcott khan North London club tan season 13 chhungin goal 108 a khung hman a, inkhelh tam a duh avangin Emirates Stadium a chhuahsan, Everton-in Leicester City an hneh ṭumin Merseyside club tan goal hnih a khung leh tawh a, a club hlui lakah zahngaihna lantir a tum lo ang.

Kum 28 mi Walcott bakah Wayne Rooney a awm sa bawk a, season kal laia league goal 34 chhuah tawh Arsenal tan ngaihṭha taka mikhual dawnsawn theih a ni dawn lo, chutihrualin Toffees hian goal 40 tehmeuh an chhuah ve tawh tho thung.

Everton hian hliam vangin James McCarthy, Leighton Baines, Maarten Stekelenberg leh Ramiro Funes Moni te an chhawr thei dawn lo a, zanina an inkhelhna tur Emirates Stadium-ah hian an lenluh hnuhnung vawi ngaah an tlawm vek bawk avangin point hmuh a awlsam dawn lo.