India-in South Africa an hneh

ODI series match ruk khelh tura an match hmasa berah India chuan Ningani zan khan South Africa chu wicket rukin an hneh a, Men in Blue tan captain Virat Kohli chuan century a vaw chhuak.

South Africa-a inkhelah hian mualneitu team an bat hmasa zawk a, batsman dang che ṭha lo mah se captain Faf du Plessis chuan run 120 a vuak chhuah avangin Proteas (SA sawina) hian over 50-ah run 269 tlinin wicket riat an hloh.

India bat hun a thleng a, over 12.2-ah run 67 chiah siama wicket hnih an hloh avangin an dinhmun a him lo angin a lang hman–mah se, India tan captain Kohli-a'n innghahna tlak a nihzia pholangin run 112 a rawn vaw chhuak a, run 79 vaw chhuaktu Ajinkya Rahane chuan ṭha takin a rawn thlawp bawk–India hian over 45.4-ah wicket li chiah hlohin target an umpha a, hnehna an chang.

Pathianni chhun dar 1:30-ah team pahnih hian series match hnihna an khel leh ang.