Aizawl FC hmabak hautak a inṭan

I League champion lai Aizawl FC-in February thlaah match sarih zet an khel dawn a, chung zinga paruk chu khualmuala khelh tur a ni. Vawiin tlai dar 3:00 hian AFC-in Coimbatore-ah Chennai City an hmachhawn dawn a, Iran aṭanga zin haw hlim Mizo club tan a awlsam dawn lo.

Portuguese coach Paulo Meneses chuan, "William-a a inhliam tih loah chuan kan chau deuh a ni mai a, kan dam ṭha e. Point thum hlawh chhuak turin kan khel ang," tiin chak ngei an tum thu Vanglaini a hrilh a, champion a harsat tawh thu a sawi lang bawk.

Hmasawn tum AFC
Aizawl FC-in cham­pion nawn tumin season bul ṭan mah se match 10 aṭanga point 15 chauh an hlawhchhuah bakah Minerva Punjab an chetsual meuh loh avangin nomawi humhim a beiseiawm tawh lo.

Mizo club hi parukna­ah an awm mek a, coach Paulo Meneses chuan, "Kan khelh tawh chinah goal chance ṭha kan khung lo tam a, kan point hmuh tur ang kan hmuh theih loh phah a ni. Chennai City hneh hi kan tum phawt ang a, tunah chuan champion ni loin palina china awm hi kan tum ang," tiin pressure tih tlem nan nomawi hawisan rih a ṭul thu a sawi.

Iran-a Zob Ahan Esfa­han FC an hneh loh ṭum­in William Lalnunfela a inhliam a, Kolasib tlang­­val hi a la dam lo. Amah­­erawhchu, AFC Champions League playoff khel tura zin ve lo Yugo Ko­bayahshi leh Leonce Dodoz ten squad hi an belh a, an goal nawr a na sawt ang.

Engtin zel?
Aizawl FC hian an mualah Chennai City 2-0 in an hneh a, amaherawhchu South Indian club hian season liam ta khan Chennai-ah 2-0 tho hian an hneh.

V. Soundararajan hote hian January 13-a Mizoram an tlawh hnuah an zin chhuak leh tawh lo a, an mualah match hnih khel leh tawhin Gokulam (0-1) leh Indian Arrows (0-0) te lakah chak hmel an hmu lo thung.

Chennai City coach Soundararajan chuan, "Aizawlah chuan AFC dinhmun a ṭha zawk a, kan sawisel theih a ni lo. Coimbatore-ah kan dinhmun a ṭha zawk ve ang," tiin Vanglaini a hrilh tawh a, Mizo club tan fimkhur a ṭul khawp ang.