NM Gupta Trophy-ah Mizoram Vs ARC, Shillong
32nd Capt NM Gupta Trophy-ah vawiin tlai dar 1:30 hian Mizoram chuan Silchar-ah Assam Regimental Centre (ARC), Shillong an hmachhawn dawn.
Champion lai Mizoram hian an match hmasa berah NF Railway chu 3-2 in an hneh tawh a, ARC hian DGAR chu 2-0 in an hneh ve bawk. Inelna hi Santindra Mohan Dev Stadium, Silchar-ah neih a ni.
Team 10 telna
NM Gupta-ah hian team 10 an inlan a, group A-ah Army Green, Bihar RC, Cosmos Club (Bangladesh), Sikh RC leh ASEB (Guwahati) te awmin group B-ah Mizoram, Arunachal SS (Silchar), ARC (Shillong), NF Railway leh DGAR te an awm thung.
Group stage hi February 10-ah a zo ang a, group khat aṭangin pahnih zelin semifinal an lut ang. Knockout stage hi February 11-ah an khel ang a, final hi February 13-a khelh tur a ni.
Mizoram team chu...
Santosh Trophy khel turin Mizoram an tling tawh a, NM Gupta hi inpuahchah nan an hmang. Qualifying round-a player pawimawh captain R. Malsawmtluanga leh keeper Lalmuanawma te chu Mizoram Police zawm thar zingah an tel a, zirna vangin midfielder pahnih Lalrinchhana leh Jacob Lalrawngbawla te an zin lo a, MPL5 best defender H. Lalhlimpuia a tel zui lo bawk.
Heng player thlak nan keeper Lalmalsawma, defender Lalmawizuala, midfielder pahnih K. Lalnunzama leh F. Zosangliana bakah forward MS Dawngliana te chu koh leh an ni.
Mizoram coach Lalsangzuala Hmar chuan, "NM Gupta hi Santosh Trophy atana inpuahchahna ṭha tak a ni. Nikum khan Silchar-ah hian kal ta lo ila, final round-ah khan semifinal kan thleng pha kher lo ang. Tournament khel loa training neih tawp hi chuan nin chin a awm a, player hian inelna hmachhawn hi an mamawh a ni," tiin MFA-in Santosh Trophy final round hmaa inelna hmachhawn tur an hmuh sak chu lawmawm a tih thu a sawi.
Inkhel tur chu
Mizoram hmachhawn tur ARC-ah hian Mizo pahnih Lalnuntluanga leh Zosangliana (Chhaia) te an awm a, FC Kulikawn leh Chanmari West forward hlui Tluanga hian match hmasa berah goal a khung bakah assist a nei bawk. Armed Veng South tlangval Chhaia hian inkhel bul a ṭan lo a, second half-ah a inlan thung.
Mizoram coach Sanga chuan, "Team tin hi an ṭha vek a, ARC pawh hi khelh an harsa ang. An match hmasa ber aṭanga thlir erawh chuan Railways ai chuan an nem zawk a, amaherawhchu sipai team hi chuan match tinah hmasawnna an neih ṭhin avangin kan fimkhur viau a ṭul ang," tiin Vanglaini a hrilh.