Reds a sen dawn nge Spurs an lam dawn?

October 2017 khan Liverpool chu Tottenham Hotspur khelmualah 4-1 in an mualpho a, inkhelh zawha Jurgen Klopp thusawi chu, "100% in kan thiam loh a ni," tih hi a ni - Pathianni zan dar 10:00-ah Reds hian Spurs an mikhual ve thung dawn.

Liverpool fan-ten 100%-a an coach inthiam loh thu sawi ngaihthlak leh ai chuan "100%-in kan khel ṭha a ni" tih ṭawngkam ngaihthlak an duh zawk dawn a, Anfield-a inkhel hmuhnawm tur thuah inhnialna tur a awm lo.

Spurs hi Manchester United hneh hlim an nih avangin an phur vanglai tak a ni a, match hnih an chak loh hnuah Liverpool-in an rilru tih 'vara' a awm theih nan Huddersfield Town chu 3-0 in an hneh ve leh tawh bawk - Anfield a sen lar dawn nge Spurs lamna tualah a chang dawn? Hei hi foot­ball khawvel hriat châk chu a ni.

Spurs fiahna
Tottenham Hotspur-in Jose Mourinho-a defensive tactic pal darh turin theihna an nei sang tawk tih an pholang tawh a, Pathianni zana an tum tur erawh team dang daih an ni - Reds attacking football hmuhnawm zia hrilh nawn kan ngai lo.

Liverpool-in league match 25-ah goal 57 ngawt an khung tawh a, match tina goal 2.28 zel khung ang an ni - Spurs tlar­hnungin fiahna an hma­chhawn dawn a, Mohamed Salah leh a ho te dan an tum ang.

Tottenham tan Liverpool goal khung theih zia sawi ruala hriat nuam tak chu an tlarhnung pherh hi a ni - Merseyside club hian goal 29 ngawt an chhuah tawh a, match khata goal 1.16 zel chhuah ang an ni. Spurs-in tlarhmaah Harry Kane an neih miau avangin Reds tlarhnung record duhawm lo belhchhah turin an ṭha tawk.

Salah vs Kane
October 2017-a team pahnih intawn ṭumin Liverpool chhuanvawr Salah dah bo a ni a, Kane-a'n goal hnih a khung thung. English striker-in a bu zawlah chuan sa huai zawk a ni tih a pholang tawh a, Salah tan a 'zia' chhuah ve hun a ni. Zawhna awm zawk chu, a ti thei ang em? tih hi a ni.

Kum 25 mi Salah hian Pre­mier League-ah match 24 khelin goal 19 a khung tawh a, inelna hrang hrangah goal 26 a khung tawh - Kane-a'n league match 23-ah goal 21 a khung a, inelna dang nena a khung zat chu goal 30 a ni.

Tottenham-in Paris Saint Germain aṭangin Lucas Moura chu pound maktaduai 23-in an lalut a, Brazil international hian Pathianni zanah Liverpool a hmachhawn nghal a nih pawhin a mak lo ang.

Thawnthu hlui
Liverpool fan-te tana thu hriat nuam tak tur chu Anfield-ah Spurs an tlangnel ngai lo - London club hian Anfield vawi 76 an tlawh tawh a, vawi ruk chiah hnehna hlado chham chungin an haw. Spurs-in Anfield-a an record duhawm lo thai chhiat tumin an khel dawn tih a chiang.

Spurs boss Mauricio Pochet­tino-a'n United an hneh hnuah, "Huaisen taka kan beih chuan hnehna kan chang thei tih a chiang," tiin rilru huaisen nen eng team pawh hmachhawn tura an inpeih thu a sawi a, Klopp-a'n Huddersfield an hneh hnuah, "Spurs laka game hautak hmachhawn turin inbuatsaih a hun ta," tiin a sawi bawk.

Liverpool-in Spurs aia point hniha an san zawkna an belhchhah dawn nge London club hian an tlansan zawk dawn? Pathianni zanah a chhanna pek kan ni ang.