US Soccer President a bang

US Soccer president Carlos Cordeiro chuan an ram hmeichhe football player-te nen hlawh chungchanga court-a an inkhinnaa ṭawngkam mawi lo hman chungchangah a thiam loh a nih thu a sawi a, banna a theh lut. 

American hmeichhe football team player 28 chuan an ram mipa team nen hlawh inzat neih an phut a, court hnenah an zualko. Ruahman ang chuan thubuai hi May 5-ah ngaihtuah tur a ni. He thubuai atan hian US football thuneitu lam chuan court-ah lehkha an thehlut a, an lehkha thehluhah hian hmeichhe team chu mipa team aia 'thiam lo zawk' leh tih tur nei tlem zawk an nih thu an tarlang. 

US hmeichhe team chuan he ṭawngkam hi an ngaithiam lo a, Nilaini khan SheBelieves Cup khelhnaah an lungawi lohna hi an lantir hial a ni. Cordeiro chuan, "Kan pawl tana a ṭha thei ang bera hnathawh hi ka thil tum ber chu a ni a, US soccer President hna ka chelh thei kha ka inchhuang takzet a ni," a ti. 

Kum 64 mi Cordeiro hian February 2018 khan US Soccer President hna hi a chelh ṭan a, court-a lehkha thehluh chu a vaia a en chhuah vek loh vang a nih thu sawiin a thiam loh a nih thu a sawi bawk. US hmeichhe team co-captain Megan Rapinoe chuan court-a lehkha thehluh tura ṭawngkam hman chu 'na' a tih a thu leh pawm dam theih a nih loh thu a sawi. 

American hmeichhe football team hian 2016-18 inkar khan US men's national team aiin ticket sales aṭangin sum an lalut hnem zawk a, nomawi an chawi hnem zawk bawk. US mipa team lam hian international level-a nomawi lian tham chawi an la nei lo a, hmeichhe team erawh World Cup-ah vawi li champion tawhin Olympic gold medal chu vawi nga an hlawh chhuak tawh.