Max nek chhuaktu Hamilton a chak
A hnehna chan lawmin car aṭangin a rawn ding chhuak a, Britain flag kengin intlansiak entu mipui 1,40,000 chuang pungkhawm hmaah hnehna hlado a chham - hnehna chang tura a nek chhuah, a khingpui ni bawk tan chuan en hrehawm tak a ni ngei ang.
Pathianni zan Formula 1 British Grand Prix-ah tualchhung tlangval Lewis Hamilton-a'n hnehna a chang, hnehna chang tur hian lap hmasa berah a hma a tlan Max Verstappen-a car ke hnung lam a tai - Red Bull car hi chhiain, driver nunna atan pawh a hlauhawm hial.
Inelna hmuhnawm
F1 intlansiak hnuhnung pathumah Verstappen a chak vek a, driver cham-pionhsip lamah pawh hma a hruai - qualifying a tlan ṭhat leh bawk avangin British Grand Prix-ah pawh a hmasa ber (pole) aṭangin inelna bul a ṭan.
Champion lai Hamilton tan a nomawi a nghing, an ramah a chak lo zui a nih chuan a hma hun pawh a harsa dawn tih a hre chiang - inelna bul ṭan aṭangin thapui a thawh nghal a, a chak theihna tur a nih chuan tih hreh a nei lo tih a lang bawk.
Lap khatna an tlan laiin kawng kawiah a hma a awm Verstappen tlan pelh a tum, hmahruaitu Max-a'n a kian mai bik lo - Mercedes driver hian a hma a car awm chu a tai a, a khingpuiin harsatna a tawh laiin a tlan pel zui nghal.
Britain tlangval Hamilton hi 10-second penalty pek a ni, an hnunga tlan Charles Leclerc chuan remchangah lain hma a rawn hruai. Ferrari driver hian season kal laia a vawi khat nan chak a inbeisei, mahse lap 52 tlan tur zinga lap 10-naah Hamilton-a'n a rawn tlan pel leh a ni.
Lewis a lawm
An ramah ngei hnehna a chang a, Silverstone tlan kawngah hian ṭum riat zek a chak ta. Hamilton tan hnehna chan hi a lawmawm a, championship lama a elpui Verstappen nen an inkar zau lutuk tur a tih zim theihna a nih avangin a lawmawm zual ang.
F1 champion lai Hamilton chuan, "Tun ṭumah hian kan infiamna hi thil hlauhawm tak a nihzia ka hre thar. Max hi elpui hautak leh ṭha bik a ni a, ṭha leh thuai turin duhsakna ka hlan - a dinhmun a ṭha tih ka hriat avangin ka lawm.
"Kei chuan engtik lai pawhin theihtawp ka chhuah ṭhin, fel lo leh dik lo erawh a awm ngai lo. Ka team lamin ka mamawh min pe a, min ṭan em emtu mipui hmaa hnehna ka chang thei hi ka lawm takzet," tiin a sawi.
Kum 36 mi Hamilton hian world title pasarih a la tawh, champion hnem ber Micheal Schumacher a nih rual mek - season kal laiah erawh pahnihna a ni mek, hmahruaitu Verstappen chu point riatin a phak lo mek.
Lungawi a har asin...
Season duhawm a hmang a, champion turin kawng dik a zawh mek - British Grand Prix erawh atan anchhia mai a ni. A chunga thil thlen danah Max Verstappen a lawm lo, a elpui chu na takin a sawisel.
Dutch tlangval Verstappen chuan, "Ka dinhmun a ṭha, chanchin lawmawm a ni. Inelna ka hman zawh dan erawh a lungawi thlak loh takzet. Penalty pek ringawt khan kan tawrhna a ti nep lo a, tlankawnga Lewis chet danah rorelna dik a thlen lo bawk.
"Damdawi in aṭangin hnehna a chan lai ka lo hmu, a chak lawma a chet dan vel kha midang zah lohna leh infiammi ṭhain an tih turah ka ngai lo. Eng pawh nise hmalam panin kan kal zel ang," tiin a sawi. Max-a team lam pawh an lungawi lo. Red Bull team principal Christian Horner chuan, "Hamilton a tihsual kha driver tawnhriat nei tlem tih awm tawk chauh a ni a, midang nunna derthawng taka a dah hnuah nuamti takin a lam thei," tiin na takin a sawisel.
August 1, Pathianni hian Hungarian Grand Prix an tlan leh dawn - champion tuma inel boruak a sang zual zel dawn tih a chiang. F1 season kal laiah hian intlansiak vawi 23 awm turin an beisei, chung zinga 10 chu a tlan tawh.
