Liverpool: Hendo hma hun a chiang lo

Premier league club Liverpool ṭantuten an thu hriat châk loh ber pawl an hria a, chu chu an captain Jordan Henderson hma hun chian loh thu a ni.

Reds captain hian Liverpool-ah kum 2023 thleng cham turin contract a nei mek a, Merseyside club nen hian contract pawhsei chungchangah rei tak chu indawrna an nei tawh.

Mahse, Hendo leh Liverpool hi an la inrem thei rih lo a, English midfielder lakluh duh hian Paris Saint-Germain leh Atletico Madrid te chuan Hendo dinhmun an thlithlai ve reng nia sawi a ni bawk.

Henderson hian a captain-na hnuaiah Liverpool chu Premier League leh Champions League nomawi a chawipui tawh tih hriat tel a ṭha.

Contract chu
Kum 31 mi Hendo hian Liverpool-ah kum hnih dang cham turin contract a la nei a, kar khatah £140,000 a hlawh mek bawk - tuna an buaina erawh hlawh a ni lo a, Reds tana a hmun chan dan tur a ni. Hendo hian club a zah a, buaina siam a duh lo. Mahse, club rilru tak tak hriat a duh.

Hendo hian contract thar a ziak a nih chuan Liverpool-ah hmun pawimawh chan reng a duh a, 'hruaitu ṭha' a nih avang maia cham a duh lo. Hei tak hi Liverpool chuan an tiam thei lo niin an sawi.

Jurgen Klopp-a'n Hendo hi chelh ngei a duh a, mahse thuneihna pumhlum a nei lo thung - Reds transfer-a thutlukna tawp siamtu chu club sporting director Michael Edwards leh club neitu Fenway Sports Group president Mike Gordon an ni.

Hemi tichiangtu chu Georginio Wijnaldum a ni. PSG pantu midfielder hi Klopp-a'n chelh duh mah se November-a kum 31 tling tur midfielder hi Edwards leh Gordon ten a contract leh hlawh beisei zat aṭangin chelh chiah an ngai lo a, a chhuak.

Tichuan...
Liverpool tana chhuanlam langsar ni thei chu contract thar chungchanga indawrna an la ngah rih hi a ni - goalkeeper Alisson chu contract thar ziak turin indawrna neihpui mek a ni a, Fabinho an dawr bawk.

Reds hian kum 2023 thleng chauh contract nei tawh Virgil van Dijk, Mohamed Salah leh Sadio Mane bakah full back pahnih Trent Alexander-Arnold leh Andrew Robertson te pawh contract thar zawrh an tum bawk.

Liverpool hian nipui transfer-ah Ibra-hima Konate chu RB Leipzig aṭangin pound maktaduai 35-in an lei tawh a, kum 22 mi centre back bak hi lei an la nei lo - Reds hian tun nipuiah insen vak ai chuan player-te contract thar ziahpui chu thupui bera neih an tum nia sawi a ni.

Mahse, Liverpool hian contract thar hi thupui bera an nei chungin an 'Captain' ber an la inrem pui thei lo - khawthlang media ṭhenkhat chuan club legend Steven Gerrard-a hun tawp lam thlengin an tarlang thar a, Hendo hian a phu anga zah hlawh tawk loa a inngai a nih chuan a chhuak daih thei. Mak ti suh ang che.