Skateboarding-ah Kima Ralte a sang

Mizo tlangval Lalnunkima Ralte chuan skateboarding-ah a hming a chher zel a, khawvel huap inelna World Round-Up Freestyle Skateboard Online Showdown 2021-ah pathumna dinhmun a luah.

Skateboarding inelna larah hian category hrang hrangah ṭhenin inelna kalpui a ni a, pro division, sponsored Am division, amateur division, masters pro division (kum 40 chung lam), masters amateur division (kum 40 chung lam), women’s open division leh rookie division (mipa leh hmeichhia kum 15 hnuai lam tan) ah te inelna neih a ni.

Kum 21 mi Kima'n inelna a hmachhawnna hi sponsored Am division tih a ni a, hei hi amateur zinga sponsorship nei skateboarder-te inelna bik a ni - he division-a pathumna nih theih hi inchhuanna tham a tling.

Sulhnu
Kima hian nikumah pawh khan amateur huangah vek he inelna hi a lo hmachhawn tawh a, palina dinhmun a luah - kuminah pen khata hmasawnin pathumna a ni a, hma a sawn leh ta hret.

Nunkima chuan, "Kum 2016 aṭang khan World Round-Up Freestyle Skateboard Championship-ah hian tel ka lo tum tawh ṭhin a, Canada-a neih a nih avangin visa lamah harsatna kan tawk leh ṭhin.

"Nikum lamah hripui vanga kalphung pangngaia inelna kalpui theih a nih tak lohah khan online hmangin inelna an buatsaih a, ka tel ve ta chauh. Kuminah pawh online hmang bawk tih niin ka inlan ve leh a, pathumna dinhmun ka luah thei ta a ni," tiin Vanglaini a hrilh.

Kalphung chu
Inelnaa tel turte hian skateboarding an ti lai video, minute khat aia rei lo chu an thawn a, background music thlengin original hman tura tih a ni - June 12 zan thleng khan thehluh theih a ni.

Khawvel huapa skateboarding judge rin hlawh pangain inelna hi an en dik a, point an pek hnuah category tina ti ṭhate hi an puang ta a ni - endiknaah hian an thiltih a harsat dawn a, style, originality leh trick an hman nawn thiam dan an en.

Tarlan tawh angin Kima telna hi amateur zinga sponsorship nei skateboarder-te inelna bik a ni a, Kima hi Indian company Piso Skateboards leh Japanese company Abby by Yabai-ten an sponsor mek a, skateboarding atana a mamawh bungruate an tumsak ṭhin a ni.

Hmachhawp
"Ka u skateboard hlui ka hai chhuak a, chuta ṭang chuan ka tui chho ta a ni," tia skateboarding-a a tui ṭan dan sawitu Kima hian hmachhawp a nei a, India rama skateboarding lama inelna lian ber Jugaad International Skateboarding Contest chu hmachhawn a tum.

Kima hian Jugaad inelna hi vawi hnih a lo hmachhawn tawh a, kum 2018 khan a vawi khat nan hmachhawnin game of skate (open) leh super minute (kum 14 chung lam) category-ah a champion ve ve.

Bangalore-a neih ṭhin inelna hi kum 2019 pawh khan a hmachhawn tawh a, game of skate category-ah hian a champion nawn leh a ni.