Barcelona-in hlawh siamrem an tum ṭan
Sum lama talbuai mek Barcelona-in an sum dinhmun siamrem hna an thawk mek zel a, sum tuak nan leh hlawh sen ral tur hum nan player engemaw zat an chhuahtir tawh.
Hemi piah lamah hian Barca hian an player langsar zinga hlawh hnem zualte chu an chhuah theih dan tur an ngaihven reng bawk a, tun dinhmunah chuan Antoine Griezmann chu an chhuahtir tur anga sawi langsar a ni.
French forward bakah hian Barca hian player hlawh hnem zingah Samuel Umtiti, Miralem Pjanic, Martin Braithwaite leh Philippe Coutinho te chu an chhuah theih dan tur an ngaihtuah mek bawk.
Barca hian an duh angin player chhuak tura an duhte hi chhuahtir thei vek pawh ni se hlawhah an la buai phak dawn tho a, an player neihlaite an hlawh tihniam turin an ngen dawn nia sawi a ni - Barca hian an player-te hlawha an insen mek aṭangin euro maktaduai 187 vel an thai bo a la ngai!
Hlawh chu
Barca hian euro tluklehdingawn khat chuang leiba an nei mek a, Covid-19 avangin an sum dinhmun ṭha lo sa chu a ṭhat loh belh nasa bawk.
La Liga thuneitue chuan ṭum danga an tih ṭhin angin club tinten season khata player hlawh atana an sen theih zat chu a siamremsak a, Barca hian season khatah euro maktaduai 160 bak an seng thei dawn lo nia sawi a ni.
Hetiang a nih avang hian Barca hian an thiampuipa Lionel Messi pawh an chelh chungin a hlawh chu 50% a tihniam turin an hmin thei a, senior player dangten a hnung an zui theih an beisei.
Spanish chanchinbu lar Marca-in a tarlan dan chuan Catalan club hian Gerard Pique, Sergio Busquets, Sergi Roberto leh Jordi Alba te chu an hlawh tihniam turin an ngen dawn.
Hlawh 40%
Barca director of football Mateu Alemany chuan player palite agent chu inbiakna a neihpui ṭan tawh nia sawi a ni a, inbiakna tak tak erawh kalpui a la ni lo thung.
Catalan club thuneitute chuan senior player pali hi 40% laia an hlawh tihniam turin an beisei dawn a, club ngenna hi an pawm thei a nih chuan thui takin club an chhawk zangkhai thei ang.
Barca hian player chhuahtirin hralh tur pawh la nei nual mah se La Liga-in kum khat budget atana an tuk sak hi a tlem lutuk deuh hlek niin a lang a, hei vang hian player dang hlawh tihhniam an rawt tel hi a awm viau.
Club president thar Joan Laporta hnuaia indinthar mek team hian player lakluh sa Eric Garcia, Memphis Depay, Emerson leh Sergio Aguero te pawh hlawh bituk huanga an la insiamrem theih loh avangin an squad-ah an la ziak lut thei rih lo.
A pui dawn em?
Senior player pali Gerard Pique, Sergio Busquets, Sergi Roberto leh Jordi Alba te hian club ngen ang takin an hlawh tihniam ta se, eng ang takin nge club an puih theih ang tih chu zawhna a ni.
Player pali zinga hlawh hnem ber Busquets hian kar khatah £258,000 a hlawh mek nia sawi a ni a, kum khata a hlawh zat chu pound maktaduai 12.4 a tling tihna a ni a, a tam tham hle.
Kum 34 mi Pique hian kar khatah £210,000 a hlawh mek nia sawi a ni a, kum khatah pound maktaduai 10.5 a tling. Sergi Roberto-a'n kar khatah £170,000 a hlawh a, kum khatah pound maktaduai 8.16 a tling.
Kum 32 mi Alba hian kar khatah £150,000 a hlawh mek a, kum khatah pound maktaduai 7.2 a hlawh - player pali hian an hlawh tihhniam hi an rem tih chuan nasa takin club a chhawk zangkhai thei ang.