Guehi-a'n Crystal Palace a zawm

Crystal Palace-in Chelsea defender Marc Guehi chu pound maktaduai 20-in an lalut. Eagles hian manager atan Roy Hodgson thlak turin Arsenal legend Patrick Vieira an lalut a, French manager avang hian English club hian ngaihven an hlawh sawt ang.

Kum 21 mi Guehi hian Chelsea tan League Cup-ah vawi hnih a khel tawh a, London club-ah khelhna hmun chang pha lo mah se hmabak êng tak a nei. Season liam ta khan loan-a a khehna Championship club Swansea tan match 40 zet a khel.

Guehi hi Ivory Coast-a piang ni mah se England youth team tan a khel a, England Under 17-in India rama U17 World Cup an champion khan a tel a, final-ah pawh bul a ṭan. Kum 2017 vek khan Euro U17-ah Three Lions hi pahnihna nihpuiin team of the tournament-ah tel. Hei chauh hi a ni lo, FA Youth Cup-ah Chelsea hi a champion pui tawh bawk.

Palace defender thar Guehi chuan, “Premier League club Palace tana khelhna hun ṭha ka nei hi ka lawm. Coach thar hnuaiah hmasawn an tum a, chumi ti hlawhtling tur chuan theithawp ka chhuah pui ang,” tiin a sawi.