Theihtawp chhuah zel a ngai - VVD

Liverpool defender pawimawh Virgil van Dijk chuan Champions League aṭangin tla mah se theihtawp an chhuah chhunzawm zel tur thu a sawi a, "Kan tih dan pangngaia kal reng kan mamawh a ni," a ti. 

Reds hian season hnih chu a zawnin Champions League final an lut a, season hmasa khan an champion. Tun season Premier League-ah fal takin hma an hruai bawk a, European football-ah pawh an beiseina a sang hle. 

Mahse, Nilaini zan khan Liverpool hian Atletico Madrid chu Champions League last 16 second leg-ah 3-2 in an ngam lo a, inkhel hmasa nena belhkhawmin an tlawmna chu 4-2 a ni.

VVD chuan, "Season tluanin ṭha takin kan khel a, hei hi kan chhunzawm zel a pawimawh. Chetsual zauh chang a lo thleng a, kan hnathawh ṭhat te awlsam takin an theihnghilh leh mai ṭhin," a ti. Liverpool hi inelna hrang hranga an match hnuhnung parukah vawi li an tlawm a, FA Cup leh Champions League an mangṭha a, Invincibles champion nih an beiseina chu a thamral bawk. 

Mahse, VVD chuan Champions League aṭanga petchhuah an nih chhan pawh an khelh ṭhat loh vang ni loa an vanduai vang a nih thu a sawi. Dutch defender chuan, "Kan khel ṭha em em a, kan vanduai a ni ber mai. Chance pawh duhawm tak tak kan nei a, mahse goalkeeper ṭha tak an neih khan danglamna a siam a ni. Chu chu football kalphung a ni miau si," a ti.