Man United- Season tharah eng nge kan beisei theih?

Sancho a chiang, Varane a chiang lo
Manchester United manager Ole Gunnar Solskjaer chuan Jadon Sancho pho chhuak turin tih fel tur tlemte chauh a awm tawh thu a sawi. English club hian Sancho hi Borussia Dortmund aṭangin pound maktaduai 72.6-in an lei.

Borussia Dortmund director Michael Zorc pawhin, "Sancho chunchang chu tih fel a ni tawh," tiin a sawi. Sancho hian nipui chawlh a hman mek avangin Man United-in official-in an la tlangzarh lo. Hetihlai hian Man United nena sawi zawm Raphael Varane erawh a la chiang lo. Solskjaer chuan, "Varane bawk maw? Player hi kan lakluh hma chu an chungchang sawi ka duh lo," tiin a sawi.

Norwegian manager hian club dang player chungchang sawi zui a duh lo a, Sancho chungchang erawh sawi chhuakin, "An puang ṭep. Tih fel tur tlem a la awm. Kan player anga kan ziahluh hunah Sancho ka hmun dan chu chiang zawkin ka sawi ang," tiin engkim a fel thu a sawi.

Hetihlai hian Marcus Rashford erawh a dar (shoulder) zai tura sawi ni mah se an ngaihtuah ṭha leh dawn a, mi thiam zawkte an rawn hnuah thutlukna an siam dawn. Rashford hi an zai a la zai lo ve thei tihna a ni a, an zai lo a nih chuan a chawlh rei a ngai lo ang.

Lingard-a'n cham a duh
Season liam taa West Ham United tana che ṭha Jesse Lingard-a'n season tharah Manchester United chhuahsan lo a, Old Trafford-ah khelhna hmun chang tura beih a duh. Ole Gunnar Solskjaer chuan, "Jesse a rawn let a, khelhna hmun chan a duh. Hetiang rilru pu player neih hi a lawmawm. Season tawp lam khan Jesse tak tak kan hmu a, amah hi ka game plan-ah a awm," tiin a sawi.

Kum 28 mi Lingard hian West Ham tan match 16 khelin goal kua a khung a, Derby nen an inkhelh ṭum pawh hian box pawn aṭangin crossbar a pet per. Hammers hian Lingard hi a nghetin lakluh an duh a, amaherawhchu Man United chhiarna zat pound maktaduai 30 an ngam lo niin a lang. Lingard hian season khat chiah contract a neih tawh avangin Man United-in contract thar zawrh an tum a, English midfielder hi Old Trafford-ah a cham a rinawm ta zawk.

Loan-a chhuak tur Chong
Manchester United pre season-a goal khung hmasa ber Tahith Chong hian loan hmangin season tharah Birmingham City a zawm dawn. Chong hian Championship club zawm dawn mah se club pahnih inremna angin Dutch winger hi season ṭan hmaa Man United training-naa tel hi phalsak a ni.

Birmingham manager Lee Bowyer chuan, "Mahni chungchang sawi hi chu sawi nuam ka ti lo a, chutihrualin loan player hi ka enkawl ṭha. Man United hi an inzir ṭha tih a hriat a, hetiang club-in ka chunga rinna an nghat hi ka lawm," tiin a sawi. Kum 21 mi Chong hian season liam ta khan Werder Bremen leh Club Brugge-ah loan hmangin a lo khel chhuak tawh a ni. Derby nen an inkhel ṭuma goal khungtu Facundo Pellistri pawh hi loan hmang bawkin a chhuah leh a rinawm.

Kum 19 mi Pellistri hian nikum nipui khan Penarol aṭangin English club hi pound maktaduai 10 bawr velin a zawm a, January khan La Liga club Alaves zawmin league match 12-ah a inlan. Tunah pawh hian loan hmanga diltu an tam leh tawh hle.

Engtik nge an kim dawn?
Copa America leh Euro 2020-a inlan player-te hnenah kar thum chawlh pek an ni. Player 15-in nipui inelna hi an hmachhawn.
- Paul Pogba, Bruno Fernandes, Scott McTominay, Victor Lindelof, Daniel James leh Diogo Dalot te chu July 24, Inrinnia QPR nen friendly match an neih hunah an rawn let beisei an ni.
- Edinson Cavani le David de Gea te chu July 28-a Brentford nen an inkhelh hunah an rawn let hman beisei an ni.
- Brazil tana khel Fred chu July 31-ah a let theih beisei a ni.
- England aiawha tel Harry Maguire, Luke Shaw leh Jadon Sancho ten August thla tirah training an ṭan ang.
- Eric Bailly leh Amad Diallo te Ivory Coast aiawhin Olympic-ah an tel a, inelna hi July 22 - August 7 chhunga neih tur a nih avangin season ṭantir lamah an tel thei lo ang.
- Marcus Rashford erawh a dar (shoulder) an zai a nih chuan October thla chhung a chawlh a ṭul ang.

Man United-in Derby an hneh
Pathianni zan khan Manchester United-in season thar atana friendly match hmasa ber an khel a, Pride Park Stadium-ah mual neitu Derby County 2-1 in an hneh. Ole Gunnar Solskjaer-a hote tan minute 18-naah Tahith Chong-a'n goal a khung a, Dutch winger hian Derby tihsual chu remchangah lain keeper Kelle Roos a patlang hnuah chiang takin a ti goal.

Second half-ah Chong-a thlaktu Facundo Pellistri-a'n keeper Roos bumin minute 59-naah chiang takin a khung. Derby-in Colin Kazim- Richards hmangin minute 70-naah an chhanglet a, goal dang a luh belh lo. Norwegian manager Solskjaer-a'n friendly match-ah player a siksawi ṭha a, player 23 zet hmangin keeper pathumna kum 21 mi Nathan Bishop chiah a inlan lo.

Pride Park Stadium-a United ṭantuten Wayne Rooney hming lamin an zai a, Derby manager hian a chhang let lo. Inkhelh banah Rooney chuan, "Kum 13 ka awm a, ka club hmangaih a ni a, ka zah em em. Derby manager ka ni tawh a, chuvangin Derby County tan hian ka rinawm. Chutihrualin Man United ṭan hun erawh a awm tho, Europa League final-ah te khan ka ṭan hle," tiin a sawi.

Player inlante
Derby XI: Roos; Byrne, Davies, Jagielka, Buchanan; Shinnie, Bird; Lawrence (C), Morrison, Aluko; Baldock.
Man United United: Heaton (Grant 46'); Wan-Bissaka (Galbraith 46'), Tuanzebe (Fish 61'), Mengi (Bernard 61'), Williams (Telles 46'); Garner (Matic 46'), Levitt (Andreas 46'); Chong (Pellistri 46'), Mata (C) (Lingard 46'), Elanga (Shoretire 46'); Greenwood (Hugill 46' (Hannibal 79')).
Player inlan lo : Bishop.