Olympic khel turin hri a kai

Tokyo Olympic 2020 khel turin infiammi an fuankhawm mek zel a, nimin tlai thleng khan infiammi bik zingah coronavirus kai pathum hmuhchhuah an ni tawh - hmuh chhuah thar ber hi USA nula gymnastics huanga inlan tur a ni.

Olympic khel tur hi Japan khawpuia 'Olympic Village'-ah dah khawm zel an ni. Japan ram an pan hma leh an thlen hnua hri lakah an fihlim em, tih endik zel niin, US nula hma hian South African footballer pahnih chu hri an kai tih hmuhchhuah a lo ni tawh bawk.

US Olympic Committee (USOC) chuan, "Kan infiammite himna leh hriselna chu kan ngaih pawimawh ber a ni, vanduaithlak takin gymnast pakhat chuan hri a lo kai, a dinhmun erawh a ṭha," an ti.

US team-ah hian gymnast ropui Simone Biles pawh a tel. Biles hian Olympic leh World Championship medal ringawt pawh 30 a nei tawh, tun ṭumah hian a che sual viau a nih loh chuan medal a lak belh leh ngei a rinawm.

Infiamna khawmpui lian hmachhawn tur hian India pawhin infiammi 200 chuang a tir chhuak dawn, a tam zawk chuan Tokyo an thleng tawh - India infiammite hian nimin khan training pawh an nei ṭan tawh.