Liverpool indinthar an tum: Salah, Firmino & Mane an nghing?

Premier League club Liverpool-in indinthar an tumna kawngah fan-ten thu hriat nuam lo hriat tur an nei zel a, Jurgen Klopp-a 'team' hmuhnawmin uaithlak lam an pan avangin club thuneitute chuan player naupang zawk hmanga team dinthar an tum mek nia sawi a ni.

Liverpool player langsar zingah rin loh taka tun hnaia boruak nei chu Jordan Henderson a ni a, Reds captain hi Merseyside club thuneitute nen contract thar chungchangah an la inrem thei lo.

Reds squad neih mekten upat lam an pan chho mek a, Liverpool hian hmalam hun thlir chunga club dinthar an duh nia sawi a ni Liverpool tlarhmaa inkawp tawh zinga hmuhnawm ber ang hiala chhal ngam Mohamed Salah (kum 29), Sadio Mane (29) leh Roberto Firmino (29) te hming thlengin a ri tawh.

Tuna thuthar ber erawh Liverpool-in Marko Grujic leh Taiwo Awoniyi an hralh tur thu a ni a, player langsar an nih loh avangin Reds fans tan thin phut dawtna tur erawh a ni lem lo.

Mangṭha Grujic
Jurgen Klopp-a'n Liverpool a enkawl hnua player a lei hmasak ber chu Marko Grujic a ni a, January 2016 khan pound maktaduai 5.1 in Red Star Belgrade aṭangin a lei.

Mahse, Serbian midfielder hian Klopp-a hnuaiah beisei anga hmun a chan zui loh avangin Porto a pan dawn.

Kum 25 mi midfielder hian season hmasa pawh kha loan-in Porto-ah a khel a, inelna hrang hrangah match 36 khelin goal hnih a khungsak - Portuguese club hian pound maktaduai 10.5-in an lei ang.

Serbia international hian Liverpool tan match 16 chiah khelin goal khat a khung a, Cardiff City leh Hertha Berlin-ah loan-in a khel tawh bawk. Hetihlai hian Nigerian forward Taiwo Awoniyi chuan pound maktaduai 6.5-in Union Berlin a zawm dawn bawk.

Kum 23 mi striker hian August 2015 khan Liverpool hi a zawm a, mahse, May thla khan UK-a a work permit chu fel ve chauhin Reds tan a la inlan lo. FSV Frankfurt, NEC Nijmegen, Royal Excel Mouscron, Gent leh Mainz-ah te hun hmang tawh striker hian season hmasa kha Union Berlin-ah hian loan-in hun a hmang tawh a, match 22-a khelhah goal nga a khungsak.

Khawih thiang lo
Liverpool-in kum 2019 khan Champions League nomawi an chawi a, Klopp-a hnuaia Reds-in nomawi an chawi hmasak ber a ni - hemi hnuah hian transfer bazar vawi nga an hmachhawn tawh a, regular player ni phak an lei chu Diogo Jota leh Thiago Alcantara te chiah an ni.

Reds hian transfer bazar-ah sum tam an seng lo chungin UEFA Super Cup, FIFA Club World Cup leh Premier League nomawi an chawi leh tawh - season hmasaah erawh nomawi chawi an nei lo a, Reds thuneituten ngaihtuahna an seng thar ṭan.

Liverpool hian heng hlawhtlinna zawng zawng an chan theih nana player thawh hlawk zingah khawih chet thiang lo ang deuhthawa ngaih an nei a, chungte chu Alisson, Fabinho, Virgil van Dijk, Trent Alexander-Arnold leh Andy Robertson te an ni.

Mahse, Reds hian an player neih dan an en a, thla 12 lo la awm leh tur an thlir - hetah tak hian thuneitute thla a muang lo a, team thar din turin Klopp hoa nomawi chawi theih ang chawi puitu player ṭhenkhat chu mangṭha an tum.

Zawi muangin
Liverpool hian man to taka player langsar sa lei ai chuan kum naupang zawk leia, chher hriam an duh - hei hian nghawng lian tak a nei a, chu chu senior player chhuah ṭhentir a ni.

Reds hian transfer bazar vawi khata team din tum ta se buaina tur a awm lo - player senior-te a ruala chhuahtir a, star rual leikhawm a ni mai. Mahse, chu chu sum dinhmun nena thlirin thil rem a ni lo.

Liverpool hian team thar hlak din thut ai chuan zawi muanga din chu an thupui a ni - he kalphung tuar hmasatu chu Georginio Wijnaldum a ni. Dutch midfielder hi Liverpool tana a ṭangkaizia hrechiangtu chu fan-te an ni.

Mahse, kum 30 mi a ni tawh a, a hlawh leh contract beisei zat enin Liverpool-in chelh chiah an ngai lo a, a thlawnin an chhuahtir. Reds hian hetiang hi thlen nawntir an duh lo nia sawi a ni a, kum upa tawh player-te a thlawna chan ai chuan contract an la neih lai ngeia man neia hralh an duh, an ti!

Tichuan
He thu buatsaih a nih thleng hian Henderson-a chungchangah thuthar a la awm rih lo. Liverpool fans tam takin an captain dinhmun an hriat rualin club thuneitute demna an auchhuahpui nghal a, Hendo chan an duh lo.

Mahse, Liverpool kalphung aṭanga thlirin Hendo hi a chhuak lo ang tih a sawi theih loh. Kar khata £140,000 hlawh mek nia sawi midfielder hi kum 31 a ni tawh a, a contract neih lai a hman zawh meuh chuan kum 33 mi a ni tawh dawn.

Hei vang hian Reds-in 'risk' an la ngam lo a, contract thar an zawrhah hian 'khelh ṭhat dan a zir' tih chu thil langsar zingah a tel. Mahse, Hendo hian player tel ve satliah nih a duh lo a, kum 35 chho thleng pawha level sang taka la inkhel theiah a inngai thung.

English midfielder hian hliam a neih ve fo bawk avangin Liverpool thuneitute hi an hlauthawng lehzual nia sawi a ni a, an inrem thei lo a nih chuan man a neih theih laia hralh mai an duh ang - Paris Saint-Germain leh Atletico Madrid ten an chang reng e!

Player pathum
Liverpool fans tan chhuak tur anga Hendo sawi ringawt pawh pai nuam a nih tawh loh dawn tehlul nen tlarhmaa an player chhuanvawr pathum Salah, Mane leh Firmino te hming a ri ve leh ta!

Player pathum hian kum 29 an tling vek tawh a, season hnih dang cham turin contract an la nei vek bawk - an contract an hman zawh vek chuan kum 30 an chuang vek tawh dawn tihna a ni a, tunah contract thar pe vek ta se hlawh tam tak nena kum 30 chuang tawh player pathum kawl hi Liverpool tan thil harsa a ni dawn.

Chu mai a ni lo - player pathum inkawp remzia hretu chu football fan-te an ni a, vawi khata anni pathum a ruala thlak nghal ṭhawt hi thil harsa a ni dawn. Chuti a nih chuan tu emaw ber hi man man taka chhuahtir theih an nih lai hian chhuahtir mai a fuh ang em, tih chu club thuneituten a ruka zawhna an inpek kual mek a ni.

Player pathum zingah Salah hi Reds-in chelh an duh ber nia sawi a ni a, Liverpool tan match 203-a goal 125 khung thei a nih avangin a awm lo hran lo - Egyptian forward hian chhuah a duh a nih loh chuan contract thar a ziak thuai turah khawthlang media-te chuan an ngai.

Firmino hi?
Senegalese forward Mane pawh la cham chhunzawm tura ngaih a ni a, player pathum zinga Jurgen Klopp-a lungdum ber ang hial ngaih Firmino hi dinhmun derthawng ber chu niin a lang ta.

October-a kum 30 tling mai tur Firmino hian season hman zawh takah sawisel a tawk nasa a, mahse, a match hnuhnung pali aṭanga goal thum khungin Liverpool-in Champions League an khelh theih nan a thawhhlawk hle.

Chutihrual chuan Firmino-a'n season hmasa tluana goal a khung zat chu goal kua a ni a, match 48-a khel - forward goal khung atan a tlem hret a, a hmun ruak luah thei tura ngaih Jota-a'n hliam vanga match 30 chiah a khel chungin goal 13 a khung thung.

Liverpool tan Firmino contract zawh hun nghah ai chuan man neia chhuahtir chu a fuh zawk ang tih a chiang a, "A chhuak ang em?" tih ai chuan, "Kuminah nge nakkumah a chhuah ang?" tih chu zawhna awm zawk a ni.

A mak lo
Tun hnaia Liverpool hlawhtlinna en ila, chhuak tur anga sawi player-te thawhhlawkzia hmuh loh a harsa a, fans tam tak chu lung a leng lawk hial mai thei - mahse, club thuneitu tan lunglen a thiang ve lo!

Merseyside club hian kan player tarlan takte zawng zawng aia huhang ngah zawk, fan-te atchilh rawn Steven Gerrard chu kum 2015 khan ui lo takin an lo chhuahtir tawh - kum khat contract an zawrh a, 40% in a hlawh an la tihniam zui! Gerrard tan chhuah lohna chi a ni lo.

Jurgen Klopp-a'n Hendo leh Firmino a ui ve ve ang tih a chiang a, Gini pawh ui taka thlah liamtu chu German coach hi a ni - a team dina player-te thlah hi a tan a harsa dawn.

Mahse, Liverpool transfer-a thutlukna tawp siamtu chu Klopp ni loin club sporting director Michael Edwards leh club neitu Fenway Sports Group president Mike Gordon te an ni a, a bik takin Edwards hian club tana ṭha tura a hriatah chuan khawngaihna leh lunglenna a lantir ve ngai lo, an ti!