Boxing-ah Olympic medal a beisei ngam em?
India hian Olympic-ah boxing record chhuan tur a nei hran lo a, chutihrualin 2008 Beijing Olympic-ah khan Vijender Singh chuan bronze medal a la a, 2012 London Olympic-ah khan Mary Kom-i'n bronze a rawn hawn leh bawk.
Amaherawhchu inelna hnuhnung ber 2016 Rio Olympic-ah erawh Indian boxer zingah medal la pha an awm lo a, Indian boxing tan chuan a lungchhiatthlak. Rio-a India-in medal a lak loh chhan hi Vijender Singh-a'n professional boxing a luhchilh vang a ni thei a, Manipuri boxer ṭha Mary Kom pawh a tel lo.
Tokyo Olympic-ah erawh boxer ṭha an rawn chhuak a, India-in boxer pakua zet a tirh dawn avangin medal lak theih a beiseiawm hle. Boxer pakua zinga panga hi mipa an ni a, pali hi hmeichhe boxer niin Mary Kom a la tel.
Boxing World Championship hnuhnung berah India-in mipa leh hmeichhe inelnaah medal paruk a la thei a, hemi ṭuma medal la pariatte chu Tokyo pan tur zingah hian an tel. Rio-a India-in boxing inelnaa medal a lak loh hnuah Tokyo-ah beisei a sang. Chutihrualin India aiawha Mizo boxer an la tel phak hun erawh a nghahlelh awm hle.
India beiseina Amit Panghal
Boxing ngaina tan chuan flyweight-a World ranking-a pakhatna ni mek Amit Panghal hi hriat loh a thiang loh. Kum 25 mi Panghal hi October 16, 1995 khan Haryana-a thingtlang khua Mayna-ah a piang a, a pa Vijender Singh Panghal chu loneitu a ni.
Amit hian a unaupa Ajay Panghal aṭangin boxing a tui chho a, a u erawh Indian Army-ah a lut thung. Kum 2007 khan Amit hian Sir Chhoturam Boxing Academy a zawm a, kum 10 hnuah National Boxing Championships-ah a vawi khat nan telin gold medal a la nghal. Kum 2017 vek hian Asian Amateur Boxing Championships-ah bronze medal a la a, 2017 AIBA World Boxing Championships-ah tel pha mah se quarterfinal-ah 2016 Rio de Janeiro gold medalist Hasanboy Dusmatov (Uzbekistan) a hneh lo. Hasanboy hi Mizo boxer NT Lalbiakkima'n a hneh ve tawh ngat.
Amit Panghal hian hma a sawn zel a, 5ft 2in chauha sang a nih avangin amah aia sang hnek dan a zir nasa. Hei bakah hian Amit hi southpaw (vei lama hnek) a nih hi a ṭhatpui. Tun ṭum inelnaah hian semifinal hma zawng boxer ṭha a tum dawn loa a lan avangin medal a beiseiawm hle. Amit-a khingpui tur zingah hian world number 2 Shakhobidin Zoirov a awm a, 2019 World Championship final-ah Uzbek boxer hi a hneh lo. India coach hlui Gurbax Singh Sandhu chuan, "Tunah chuan Amit-a dinhmun hi a ṭha tawh zawkin ka hria, chutihrualin engmah a hriat lawk loh. Fight thar a ni dawn a, Amit hi chak turin a huaisen ve tawkin ka hria," tiin a sawi.
Amit Panghal
Mipa - Flyweight, 52kg
World Ranking: 1st
Inlan hun
July 26 (AM & PM): Round of 32
July 31 (AM & PM): Round of 16
August 3 (AM & PM): QF
August 5 (PM): SF
August 7 (PM): Final
Hlawhtlinna
Event Gold Silver Bronze
World Boxing Championships - 1 -
Asian Games 1 - -
Commonwealth Games - 1 -
Asian Boxing Championships 1 1 1
Total 2 3 1
Hmeichhe boxer
Mary Kom : Manipur boxer Mary Kom hi khawvela hmeichhe boxer ropui berte zingah a tel pha. Amaherawhchu Mary Kom hi Olympic-ah a vannei tawk ṭhin lo a, bronze medal chauh a la pha. Manipur boxer hi kum 38 mi a nih tawh avangin medal lak beiseiawm ni mah se gold medal lak a har dawn. 2019 World C'ship semifinal-a a hneh loh Turkish boxer Businaz Cakiroglu bakah world champion ni lai American Lilya Aetbaeva te chu a beiseina ti thlawn thei zinga mi an ni ang.
Simranjit Kaur : Punjab boxer Simranjit Kaur hian 64 kg weight category-a a tel laiin 2018 World C'ship-ah silver medal a dawng a, a rihna paihin 60 kg weight category-a a tel hnuah Asian C'ship-ah silver leh bronze medal a dawng pha. Mahse an category-ah hian boxer ṭha panga Beatriz Ferreira (Brazil), Mira Potkonen (Finland), Kerrie Harrington (Ireland), Rashid Ellis (USA) leh Cong Wang (China) te an awm avangin medal la tur zinga dah a ni lo.
Lovlina Borgohain : Assam boxer Lovlina Borgohain hi world ranking-ah pathumna a ni a, hemi avang hian medal lak an beiseina a sang dawn. Kum 23 mi Borgohain hian inelna lian World C'ship, Asian Games, Commonwealth Games leh Asian C'ship-ah medal a dawng vek tawh. Amaherawhchu World no. 1 Turkish boxer Busenaz Surmeneli bakah Nien Chin Chen (Chinese Taipei), Hong Gu leh Yang Lui (China), Nadine Apetz (Germany) leh Myriam Da Silva (Canada) te an awm a, medal lak hi a awlsam dawn lo. Lovlina hian 2018 World C'ship semfiinal-ah Chen hi a hneh lo a, 2019 khan semifinal-ah Chinese boxer Yang Lui a hneh lo bawk.
Pooja Rani : Hayrana boxer Pooja Rani hian a dar (shoulder) inhliam vangin boxing chawlhsan thei dinhmunah a ding a, amaherawhchu huaisen taka rawn kirin Tokyo kal thei tur zingah a rawn tel. Tawnhriat nei ṭha Rani hi kum 30 mi ni tawh mah se kumin khan Asian C'ship-ah gold medal a la a, Olympic-ah pawh medal a beisei a ngam ang.
Mipa boxer
Manish Kaushik : Haryana boxer Manish hi 5ft 8in a sang a ni a, Covid-19 vanneihpuitu zingah a telah a ngaih theih. A chhan chu a ban hliam vangin thla 10 dawn a chawl a, Tokyo-a inlan turin a dam hman. Kum 25 mi Manish-a khingpui tur zingah hian World champion lai Cuban boxer Andy Cruz leh World number 1 ni mek American boxer Keshawn Davis te an awm. World C'ship semifinal-ah Manish hian Cruz hi semifinal-ah 5-0 in an hneh lo a, medal lak phak hrim hrim hi a har ang.
Vikas Krishan Yadav : Haryana boxer Vikas Krishan Yadav hi Olympic-ah ṭum hnih a inlan tawh a, kum 29 mi hian tawnhriat a nei ṭha. Vikas-a telna category hi an ṭha tlang a, 2019 World C'ship-a bronze medal la pha Uzbek boxer Bobo-Usman Baturov chu ranking-ah pariatnaah a awm chauh a, hei hian a harsat turzia a tichiang.
Ashish Kumar : Himachal Pradesh boxer Ashish Kumar hian Asian C'ship-ah a zawnin medal a la thei a, Covid-19 a kai avangin inbuatsaihna a ṭha tawk lo bawk. Chutihrualin Ashish hian Olympic-a tel tura a tlin hma thla khatah a pa chan a, hei hian a rilru paukhauh zia a tichiang. Medal la thei tur zingah Ashish hi beisei chi a ni lo a, quarterfinal a thleng a nih chuan chanchin lawmawm lam a ni.
Satish Kumar : Uttar Pradesh boxer Satish Kumar hi 6 ft 2 in zeta sang a ni a, world ranking-ah 23-na daih a nih avangin medal lak a beiseiawm lo a, bronze medal a la phak a nih chuan chanchin lawmawm a ni ang.