India coach Stimac-a contract an pawtsei
All India Football Federation (AIFF) technical committee chuan India coach Igor Stimac chu a contract tawp hnai mah se kum khat dang atan contract thar an pe a, September 2022 thleng Blue Tigers coach a nih chhunzawm dawn tihna a ni.
AIFF chuan thuchhuah siamin, "AIFF technical committee chu chairman Shyam Thapa kaihhruaina hnuaiah video conference hmangin an inrawnkhawm a, hetah hian Stimac chuan national team hmasawnna leh kalphung inthlak danglamte a tarlang a, Blur Tigers rawltharte hmasawnna a tarlang bawk.
"Committee chuan uluk takin hengte hi a thlir a, kan tun khawvel dinhmun te, AFC Asian Cup qualifier kan hmabakte ngaihtuahin Stimac rawih chhunzawm mai hi a ṭulin a hria a, September 2022 thleng atan a ruai nawn a ni," an ti.
Stimac-a sulhnu
Croatia boss hlui Stimac-a kaihhruaina hnuaiah India-in vawi hnih chiah chak an nei a, heti chunga contract thar pek a ni hian mak tih a hlawh hle - Blue Tigers hi match 15-ah a kaihruai tawh a, vawi ruk draw result neiin vawi sarih an tlawm thung.
Stimac-a hnuaia India match langsar chu Qatar an inhnehtawkpui kha a ni a, World Cup qualifying match-ah Asian champion hi Sunil Chhetri tel loin an chelh thei - a hnuaia an hneh pahnih hi Thailand leh Bangladesh an ni.
Croatian coach kaihhruaina hnuaiah India tan player 20-in an match hmasa ber an khel a, India tana vawi li inlan tawh Lalengmawia (Apuia) chu Stimac-a hnuaia ram tana match hmasa ber khel zingah a tel.
Hmabak chu
Stimac hian World Cup 2022 qualifier-ah India a kaihruai a, group E-ah awmin pathumna an ni a, World Cup khel tura an zinkawng a tawp rualin Asian Cup 2023 qualifying third round an khel thei dawn thung.
AFC Asian Cup qualifier hi February - September-ah khelh a ni dawn a, China-a neih tur inelnaa India an tlin theih nana hnathawh chu Stimac-a hna tur a ni ang.
October-ah qualifier-a inkhel turte pawhna (draw) chu neih a ni dawn. Team 24 an inel ang a, group A-F ah ṭhenin, group tinah team pali zel an awm ang a, group tina pakhatna leh pahnihna zinga a ti ṭha panga chu Asian Cup 2023 khel turin an tling dawn a ni.