Arsenal-ah Sambi a lut fel

Premier League club Arsenal chuan Albert Sambi Lokonga chu Anderlecht aṭangin an lalut fel a, a contract rei zawng hi chiang taka tarlan ni lo mah se hun rei tak chhung atan tih erawh an ziak lang.

Belgium Under-21 international hi pound maktaduai 17.2 man bawr vel a ni. Belgian club tan season hnih chhung chu rinrawl a ni phak tawh, a club thara khel phak tur erawhin theihtawp a chhuah a ngai dawn.

Kum 21 mi Sambi hian kum 15 mi chauh a nih laiin Anderlecht hi a zawm, 2017 December thla khan senior team tana a match hmasa ber a khel ṭan, a club tan hian inelna hrang hrangah match 78 a khel hman.

Arsenal manager Mikel Arteta chuan, "Albert hi player fing tak a ni, a kum la tlem mah se a puitling tawh bawk. Anderlecht-ah khan Vincent Kompany-a'n a kaihhruai ṭhin, an coach nen hian kan inhre ṭha hle.

"Vincent hian Albert chung-chang hi chiang takin min hrilh, tun hnaiah nasa taka hma a sawn thu pawh a sawi. Season thara hmasawn kan tumna kawngah kan player pawimawh a ni ang," tiin a sawi.

A club thar chungchang sawiin Sambi chuan, "Ka naupan lai aṭangin Anderlecht-ah ngar ngar ka awm, kum 10 chuang ka awm tawhna chhuahsanin Arsenal ka zawm a ni a, ka tan chuan chona lian tak a ni chiang hle.

"Premier League khelh ka châk tawh, a bik takin Emirates Stadium-a inkhel bul ṭantu nih ka châk hle. Goal nawrtu ka ni thei a, a venhim lam pawh ka thawk thei," tiin midfield-ah chuan ma-mawhna hmunah a tlan theih thu a sawi.

Arsenal technical director Edu chuan, "Albert hi club tam takin an ngaihven, keini pawhin hun rei tak chhung kan hel tawh leh duh tak a ni a, kan midfield lai tichak thei tur a nih avangin a rawn lut hi kan lawm," a ti.

Gunners hian tun nipui bazar chhungin Benfica aṭangin Nuno Tavares chu pound maktaduai riat sengin an lalut tawh a, England defender Ben White chu Brighton aṭangin pound maktaduai 50 sengin an lalut dawn bawk.