Olympic Village-ah Barty awm ve dawn lo

Hmeichhe tennis world number 1 Ashleigh Barty chuan Tokyo Olympic khel turin Japan khawpui a thleng tawh a, infiammite awm khawmna tur bika an siam Olympic Village-ah erawh a awm ve dawn lo.

Inelna buatsaihtu lamin infiammi zawng zawngte chu Olympic Village-ah hian awm khawm turin an ti a, he hmun hi hri leng lakah pawh him tawk tura buatsaih a ni. Mahse, hri kai pathum hmuhchhuah an ni tawh.

Australia team chef de mission Ian Chesterman chuan, "Kan ram aiawh zawng zawngte chu Olympic Village-ah awm tura beisei an ni, mahse hri leng vangin buaina erawh a awm thei, chu chu kan thunun theih a ni tawh lo," tiin a sawi.

Barty hi Olympic Village-ah awm lo mah se hmun him leh midang tlawh pawh theih lohna tur hmunah a awm tur thu an sawi. Wimbledon title la hlim niin inrintawkna nei sang viau mah se a rilru erawh coronavirus vangin a chiai tih a lang.