Season hnih atan Brahim an hawh

AC Milan chuan Real Madrid aṭangin Brahim Diaz an lalut. Spanish midfielder hi season hnih chhung loan hmangin an hawh phawt ang, a loan hun a zawh hunah a ngheta lak nghal mai theih erawh a ni dawn rih lo.

Kum 21 mi Diaz hian 2019 khan Manchester City aṭangin Real Madrid hi a zawm, mahse Spanish club lian tan khelhna hmun a chang thei mai lo - season hmasa khan loan hmang bawkin Milan tan hian a lo khel tawh.

AC Milan chuan thuchhuah siamin, "AC Milan chuan season hnih chhung atan loan hmangin Brahim Diaz chu lawm takin kan hawh, kan inremna hi 2023 June 30 thleng daih a ni ang," an ti.

Milan hian an midfielder Hakan Calhanoglu chu Inter Milan lamah an chan a, kum 21 mi Diaz hian Calhanoglu hmun ruak a luah thei tura ngaih a ni.