Carroll-a'n Magpies a chhuahsan

English striker Andy Carroll chuan Newcastle United a chhuahsan a, Magpies coach Steve Bruce chuan a contract hmang zo striker leh club chu ṭha taka an inṭhen thu a sawi.

January 2011-a pound maktaduai 35-a Liverpool a zawm avanga British player man to ber lo ni tawh Carroll hian beisei angin a career a hmang thei lo.

Liverpool-a beisei a phak loh hnuin kum 2012 khan loan-in West Ham a zawm a, 2013 khan a nghetin a zawm zui. London club-ah kum 2019 thleng khelin match 142-ah goal 34 a khung.

Kum 2019 khan Liver-pool-a pan hmaa hming a lo chher tawhna Newcastle-ah bawk hian a kir leh a, mahse, season hnih chhunga match 43 khelin goal khat chiah a khung - hliamin a tlakbuak reng avangin Bruce-a hnuaiah league match riatah chiah bul a ṭan.

Carroll-a chhuah lai hian Magpies chuan Joe Willock kawl chhunzawm theih dan an ngaihtuang thung a, kum 21 mi midfielder hian February 2021 khan Newcastle hi Arsenal aṭangin loan hmangin a zawm a, season chanve a cham chhungin league match 14-ah goal riat a khungsak hman.

Steve Bruce chuan Willock hi loan bawka hawh leh theih a inbeisei a, engkim chu Arsenal kuta innghat a nih thu a sawi thung. Bruce chuan, "Ka sawi tawh angin thutlukna chu Arsenal kuta awm a ni.

"Arsenal hian club lian ho tih ṭhin angin pre-season ah enchhin phawt an duh ang tih ka ring a, chutiang thutlukna an siam hma chu keini chuan kan lo thlithlai reng ang a, Willock neih theih dan kan ngaihtuah zel ang," a ti.

Magpies hian French defender Florian Lejeune chu an chhuahtir dawn niin a lang bawk a, season hmasaa loan-a a khelhna Alaves nen a ngheta zawm turin inbiakna an kalpui mek.

Newcastle United hian Pathianni khan season thar inbuatsaih nan non-league club York City an hmachhawn a, 1-0 in an tlawm - he inkhelah hian senior keeper chhawr tur an nei lo!

Season hmasaa vawi 14 inlan Martin Dubravka chu inhliam vangin a chawl mek a, match 26 kheltu Karl Darlow-a'n Covid-19 a kai a, Freddie Woodman leh Mark Gillespie te chu Covid-19 an kai hnuah negative result nei leh tawh mah se dan angin an la inkhunghrang rih bawk.

Senior keeper pathum awm loh lai hian kum 20 mi Daniel Langley chu Magpies senior team tana a match hmasa ber khelin goal a veng. Bruce chuan, "Covid-19 hi chu a buaithlak a ni.

"Footballer ni mah se hripui an kai lo thei bik si lo. Kan inven fimkhur a ngai hle a ni," tiin hripui vanga buai thei reng an la nih thu a sawi.