Everton-in Townsend leh Begovic lalut hnai

Rafael Benitez hnuaia indinthar tum Everton-in transfer bazar-ah an mit an len ṭan a, Crystal Palace winger hlui Andros Townsend leh Bourne-mouth goalkeeper Asmir Begovic te nen inremna an nei hnai.

Kum 30 mi Townsend hi June khan Palace-a a contract neih lai chu a tawp a, club nei loin a awm mek - season hman zawh takah khan league match 34 khelin goal khat a khung a, assist vawi nga a nei.

England tana vawi 13 inlan tawh Townsend hian Tottenham Hotspur, Queen Park Rangers leh Newcastle United tan pawh a lo khel tawh a, a tawnhriat ringawt pawh hi Everton tan chuan a ṭangkai ang.

Kum 34 mi Begovic-a'n Azerbaijan Premier League thlenga a khelh lawp lawp hnuah season hmasa khan Bournemouth-ah first choice keeper a ni leh a, inelna hrang hrangah match 51 ngawt a inlan - a team hi Championship playoff semifinal a hruai thleng hial a ni.

Portsmouth aṭanga a professional career ṭantu keeper hian English football-a hming a chher tak takna chu Stoke City a ni a, season nga leh a chanve chu Premier League-ah Stoke tan a inlan.

Kum 2015 khan Chelsea a zawm a, season hnih a cham chhungin match 33 a khel a, Premier League nomawi a chawi hman. Kum 2017 khan inkhelh tam duhin Bournemouth a pan a, season hnih chhung match 62 a khelh hnuah Ajerbaijan club Qarabag chu loan-in a zawm.

Thla ruk a cham hnuah loan thoin AC Milan a zawm leh a, season hmasa ṭan dawn khan Cherries-ah a kir - a career a tawp mai dawn nia a lan hnuah a intuai thar leh a, tunah chuan Premier League-a kir thei dinhmunah a ding leh ta.