Entu awm lo a khawhar thlak dawn - Djokovic

Novak Djokovic chuan Serbia tana Tolyo Olympic a khel thei tur chu a phur thu a sawi a, chutih rualin hri leng vanga a hmuna entu an awm thei lo tur chu khawhar thlak dawn hlea a hriat thu a sawi bawk.

Tennis season kal laiah Djoko-vic hian Grand Slam pathum - Australian Open, French Open leh Wimbledon a la tawh. Olympic gold medal leh US Open title a la leh thei a nih chuan 'Golden Slam' a ni dawn.

Mipa player zingah Golden Slam ni thei hi an la awm ngai lo a, player ropui Roger Federer leh Rafael Nadal te meuh pawhin an tih theih loh a ni - tunah Djokovic tan hun ṭha a inher chhuak mek.

World number 1 Djokovic chuan, "Serbia a nih tawh chuan engmahin a tluk zo lo, a pawimawh ber chu a ni. Ram tana inlan phak hi ka naupan lai aṭanga ka duhthusam a ni ṭhin, tunah pawh a la danglam chuang lo.

"Olympic a nih phei chuan mimal hmingṭhatna ai chuan ram tana medal lak chakna chu lian zawk tak a ni. Tun hmain Olympic ka lo khel ve tawh ṭhin, kuminah hian a vawi khat nan singles huangah gold medal lak ka tum ang," a ti.

London Olympic-ah khan Djokovic hi an ram puanzar (flag) kengtu a lo ni tawh. Rio Olympic-ah khan a inlan bawk a, mahse Juan Martin del Potro a ngam lo - kuminah hian eng nge a thlen dawn chu kan hre thuai dawn.

Olympic hi a nihna takah chuan nikuma neih tur kha a ni, mahse hripui vangin kum khatin an sawn tlai. Kuminah hian entu awm thei tura beisei a ni a, mahse tunah chuan tualchhung mi tan pawh en theih a ni dawn lo.

Djokovic chuan, "Duhthu-samah chuan stadium khat tlatin mipui pungkhawm se, chumi hma chuan theihtawp chhuahin inkhel ila. Mahse, kan thunun theih piah lam thil a thlen miau avangin a tih ngaihna a awm lo, khawhar taka inkhelh a ngai dawn," a ti.

Olympic gold medal a la thei a nih chuan Djokovic tan hian Nadal leh Federer te chunga awm theihna remchang a ni dawn. Nadal-a'n Olympic gold medal a la tawh a, Federer erawh singles huangah bik a la champion lo.

Djokovic chuan, "Tunah chuan Olympic hi ka hmathlir lian ber a ni a, chumi hnuah inelna dang chu ka ngaihtuah leh chauh ang. Serbia tan ka theihna zawng zawng ka hlan hmasa phawt dawn a ni," tiin a sawi.

September thla hian US Open an khelh chhunzawm leh dawn. Hliam leh hri leng vangin player tam takin harsatna an tawk ṭhin, world number 1 Djokovic ngei pawh Tokyo hnuah hian New York lamah a inkhel zui thei kher ang em tih a la chiang lo.