Entu awm loin ISL final khelh a ni dawn

Covid-19 chuan infiamna khawvelah pawh nghawng a nei zel a, India pawh kan bang bik lo - Indian football-a league sang ber Indian Super League chu entu nei loin final an khel dawn!

Zanin dar 7:30-ah ISL final hi khelh tur a ni dawn a, Lallianzuala Chhangte, Jerry Lalrinzuala leh Laldinliana Renthlei te khelhna Chennaiyin FC leh ATK chuan India rama club ṭha ber nih an inchuh dawn - en ngei chi a ni. 

ISL final khelh tur boruak sang tak karah coronavirus ngaihthah theih a ni lo a, ISL enkawltu Football Sports Development Limited (FSDL) chuan Goa-a inkhel tur hi entu awm loa khelh a nih tur thu an puang. Lallianzuala Chhangte chuan, "Fan-te avanga football hi hlu ve chauh a ni a, entu nei loa final khelh ngai tur hi hriatthiam harsa tak chu a ni. Mahse, kan vaia kan him tlanna tur a ni bawk si," tiin Vanglaini a hrilh. 

Zanin ISL final inkhel tura Chennaiyin leh ATK khaikhin hlawh pakhat chu Lallianzuala Chhangte leh Prabir Das an ni a, Indian player ṭha pahnih hian an team tan an thawhhlawk dun hle. Lianzuala hian match 20 khelh tawhah goal sarih a khung a, tun season ISL-ah Indian player zingah penalty chhiar tel lohin ani aia goal khung hnem an awm lo - tlarhnung a puih ṭhatna hi fak a hlawhna a ni tel bawk. 

Chennaiyin boss Owen Coyle chuan, "Lianzuala hi player thawkrim tak a ni a, thil harsa hi awlsam tak angin a lantir ṭhin. Tlarhnung inrem phui tak paltlang hi football-a thil harsa ber pawl a ni a, awlsam takin a ti mai zel a ni. Team tan a thawhhlawk takzet," tiin a player hi a fak. 

Prabir Das erawh wing back a ni a, Lianzuala angin goal hmaah hlauhawm lo mah se ball cross chu a chakna innghahna a ni - vawi nga assist a nei tawh a, Roy Krishna leh David Williams ten an ṭangkaipui hle. 

ATK leh Chennaiyin-ten goal khung lamah harsatna an nei lo a, club pahnih tan Roy Krishna leh Nerijus Valskis chu goal khung khawl an ni a, zaninah player pahnih hian en bik an hlawh a nih pawhin a mak lo ang. 

Kum 32 mi Krishna hian tun season-a match 20-a khelhah goal 15 a khung a, assist vawi nga a nei. Match tina 0.75 goal khung zel ang a ni a, a kawppui David Williams hi match 17-a goal sarih khunga assist vawi li nei thei tho a nih avangin ngaihthah a rem bik lo ang. 

Chennaiyin tan Nerijus Valskis chu innghahna a ni a, match 19-ah goal 14 khungin assist vawi ruk a nei tawh. Israeli club ṭha Hapoel Tel Aviv aṭanga Chennai club zawmtu hi ATK tlarhnungin ven uluk an mamawh ang. 

Malta international Andre Schembri hi thai bo harsa tak a ni bawk. Kum 33 mi striker hian match 17-ah vawi nga goal a khung tawh a, assist vawi thum a nei tawh. 

ISL final khel tur zingah Chennaiyin player Lianzuala, Jerry leh Dinliana te chu bul ṭan leh ngei tura beisei an ni a, hetihrual hian Jeje Lalpekhlua leh Zohmingliana Ralte erawh hliam vangin an la chawl thung. 

Chennaiyin player zingah Masih Saighani hi Aizawl FC tana 2017-18 season-a lo khel tawh kha a ni a, Afghan defender hian tun season-ah Chennai club tan match 12 a khel tawh. ATK tan Ricky Lallawmawma chu ISL squad-a Mizo awmchhun a ni a, Durtlang tlangval hian season hmasa khan Kolkata club tan match 17 khel mah se tun season-ah erawh a la inlan lo. 

Kolkata club tan Jayesh Rane chuan match 18 khel tawhin goal khat a khung a, assist vawi thum a nei. Kum 27 mi forward hi 2016-17 season khan Aizawl FC tan a lo khel tawh a, I League nomawi a chawi. 

Semifinal First Leg Result

Chennaiyin FC    4 - 1    FC Goa

CHE: Lucian Goian 54'; Anirudh Thapa 61'; Eli Sabia 77'; 

   Lallianzuala Chhangte 79'

FCG: Saviou Gama 85'

Bengaluru    1 - 0    ATK

BEN: Deshorn Brown 31'

Semifinal Second Leg Result

FC Goa    4 - 2    Chennaiyin FC

FCG: Lucian Goian 10' (OG); Mourtada Fall 21', 83'; 

   Edu Bedia 81'

CHE: Lallianzuala Chhangte 52'; Nerijus Valskis 59'

March 08, Pathianni Zan

ATK    3 - 1    Bengaluru FC

ATK: Roy Krishna 30'; David Williams 63' (P), 79'

BEN:  Ashique Kuruniyan 5'

Zanin Inkhel Tur - Final

Chennaiyin FC    7:30 PM    ATK

•    ISL league round-ah ATK hian point 34 an hlawh chhuak. Match 18 khelhah vawi 10 an chak a, vawi li an tlawm a, vawi li an khingpui an inhnehtawkpui. 

•    ATK hian league round-a pathumna Bengaluru chu semifinal-ah hmachhawnin an hneh a, final an lut. 

•    Chennaiyin hian league match 18-ah vawi riat hnehna an chang a, vawi nga an tlawm a, vawi nga an khingpui an inhnehtawkpui. 

•    Semifinal-ah league round-a pakhatna FC Goa an hneh a, final an lut. 

•    ATK leh Chennaiyin hi ISL-a vawi hnih champion tawh ve ve an ni a, anni aia champion hnem an la awm lo.