Zanin dar 8:30-ah Futsal final Zonuam Vs Dinthar

Lalmalsawma Memorial Futsal MFA Inter Village Futsal Tournament 2020 champion chu zanin hian khelh a ni dawn a, Mizoram chhunga futsal thiam ber veng/khua a hriat dawn. Final hi zan dar 8:30-ah Zonuam leh Dinthar B ten an khel dawn a, futsal hmuhnawm an pho chhuak thei ang.

He futsal inelnaa champion team hian Rs 70,000 leh nomawi an dawng dawn a, pahnihnain Rs 40,000 an hum haw ang. Mimal chawimawina best player leh top scorer lawmman a awm dawn a, final lut zo ta lo Republic Veng leh Chhinga Veng ten Rs 10,000 an dawng bawk ang.

Football thiam vangin Dinthar an lar a, futsal lamah pawh team nei ṭha zinga mi an ni. Futsal khel thiam an tam a, tun ṭum inelnaah pawh team hnihin an chhuak. Team A-ah MFA hnuaia Futsal League club Lawmna FC player leh team enkawltute an awm a, Team B-ah hian football lama hming chher an tam thung.

Futsal thlirna aṭang chuan Team A hi ṭha zawka ngaih an ni. Amaherawhchu coach Lalchhuanawma Pautu (LCh-a) enkawl Team B an thleng sang ta zawk. Dinthar B-ah hian Futsal League-a Chanmari innghahna Samuel Laltlanthanga leh Reuben Zosangpuia te an awm a, football leh futsal-a tawnhriat nei pahnih hian team an tiṭha hle. Semifinal-a Chhinga Veng an hneh ṭum pawhin first leg-ah Samuel-a tawnhriat an hmang ṭangkai a, second leg-ah Reuben-a a rawn awm leh chiah avangin champion tura rinkai zinga mi Chhinga Veng pawhin Dinthar an ngam lo. Coach LCh-a game plan-in fak a phu a; Ayush Dev Chhetri, Lalherliana leh Lalawmpuia Sailo te pawh an rintlak hle.

Futsal inelna ṭantirh aṭangin Zonuam thiamzia an sawi nasa a, team anga an ṭhatna tak hi an tlona tak pawh a ni. Zonuam hi MFA Futsal League team an ni a, club khata awm sa vek an nih avangin player an inhre chiang a, an khel pawh a hmuhnawm.

Goalkeeper H. Rosangliana chu tlarhnung aṭanga team kaihruaitu a ni a, MPL ṭantirh lama hming langsar Lalṭhazuala (Puitea) chu game siamtu a ni thung. Zonuam hian semifinal-ah Republic Veng B an hneh a, match hnih an khelhah goal 13 lai khung mah se Puitea hi goal khungtu zingah a tel lo a, hei hian team anga an ṭhatzia a pholang. Semifinal-a goal sarih ngawt khungtu Lallawmsanga bakah Laldinthara Chenkual leh Varthanzama te an kawl bawk avangin Dinthar an elpha chauh ni loin champion tura rinkai zawk an ni hial ang.