Arsenal lawmna a sang zel

Pierre-Emerick Aubameyang leh Henrikh Mkhitaryan an neih avanga Arsenal lawmna chu a chim chin a sang chhunzawm zel. Inrinni zan Premier League inkhelah Aubameyang-a'n a club thar tan match hmasa berah goal khung nghalin Everton lakah 5-1 in hnehna a chanpui.

Emirates Stadium-ah Theo Walcott-a'n a club hlui a hmachhawn a, English forward goal khung tur hi Gunners defender Shkodran Mustafi-a'n ṭha zetin a dan sak. Thlasik bazar tawp nia Gunners chhuahsantu dang striker Olivier Giroud pawhin zanin dar 1:30 hian champion lai Chelsea jersey ha chungin Watford a hmachhawn dawn thung.

Laipui a puak ring
Arsenal tan midfielder Aaron Ramsey-a'n a vawi khat nan hattrick a siam a, defender Laurent Koscielny leh Borussia Dortmund player hlui Aubameyang ten goal khat ve ve an khung bawk.

Arsene Wenger-a'n Aubameyang chu dam lohna vanga inkhel lo thut thei a nih thu a sawi, mahse bul ṭantir a ni. Pound maktaduai 56 man striker hian Gunners tana a goal hmasa ber khung turin hun a mamawh rei lo, minute 37-naah Bundesliga lama a khelhpui tawh Mkhitaryan hnen aṭanga a ball hmuh chu a khung.

Gabon international Aubameyang hi goal a khung dawn hian a offside ngei niin a lang a, mahse ham a ni lo. Season hmasa Bundesliga goal 31 khung thei striker hi Everton goalkeeper Jordan Pickford hmaah a chiai lo a, hun tepter leh chep tak karah cool zetin a chip lut keuh thei a ni.

Arsenal tan Mkhitaryan-a'n goal khung lo mah se an goal nawrna thapui pawimawh ber pakhat a ni. Armenia captain hian a ṭhiante goal khung tur vawi thum a siamsak a, Mesut Ozil leh Ramsey nena inkawpin midfield an thunun; Jose Mourinho-a chhawr fuh loh hi Wenger hnuaiah a par chhuak leh dawn niin a lang.

Balance a ngai
Arsenal manager Arsene Wenger chuan Everton an hneh hnuah season ṭha taka hmang chho zel tur chuan team balance an neih ṭhat a ngaih thu a sawi.

Gunners hian goal khung kawngah chuan harsatna an nei lo a ni mai thei, mahse ven theih tur nia lang Dominic Calvert-Lewin tauh luh tur an dang hman lo a, striker Oumar Niasse-a'n goal ban a pet per bakah an tlarhnung a nghing fo bawk.

Wenger chuan, "Team ngelnghet neih chu kan tan chona a ni ang, kan goal nawr a na tawk tih chu a hriat a, chutih rualin a khung bakah a venhim hna ṭha taka thawh kawp theih chu season tluana kan mawhphurhna leh hna pawimawh a ni ang," tiin a sawi.

Match 500
Sam Allardyce-a'n manager a nih hnuah a naute chu Premier Legue match 500 a khelhpui tling chiah a, vawi 196 a chak lohna chiah a ni, ani aia chak lo hnem awmchhun chu Harry Redknapp (238) chiah a ni.

Arsenal lakah Allardyce hian tlar-hnungah player pathum a dintir a, beisei angin midfield an thunun theih tak bawk si lohah chuan an che chhe hle. An tlarhnung a phui lo a, inkheltir lam minute 20 chhungin goal thum an chhuah hman, chawlhlawk hman a nih laiin si li an phur a, chak tur a chiang nghal vek tawh.

Kum 63 mi Sam Allardyce chuan, "Inkhel bul ṭantu player 11 khan hun chanve hmalam kha an hmang chhe hle a, khelh dan tur ruahmanna kan neih angin ka ti thei lo. Kan chak loh avangin ka thinrim a, hun kan neih chhunah hian ka duh anga khel chhuak thei turin player lam pawhin an bei ang," tiin a sawi.