Republic an chak nghal

Republic VR4-in Mizoram Super League an vawi khat khelhnaah Mission Vengthlang Hollow chu 84-70 in an hneh a. Inelna neihna hmun Hawla Indoor Stadium hi Republic Vengthlanga awm a nih avangin kai thar VR4 hian ṭantu an nei ṭha hle.

Zirtawpni zan inkhelah Republic-in bul an ṭan ṭha a, halftime-ah 43-25 zetin hma an hruai tawh. Third quarter-ah Hollow rawn che ṭha mah se chak phu zawk VR4-in 84-70 in an chak.

VR4 tan Republic Veng tlangval TC Lalnunmawia (16 pts) leh C. Lalchhandama (15 pts) te an che ṭha a, tawnhriat nei ngah Lianhmingmawia (14) leh Lalnunmawia Sailo (15) te hun pawimawhah an che ṭha bawk.

Hollow-in Lalhmachhuana leh Lalruatfela te awm lo an tuar a, tho chhuak turin player an nei ṭha tawk lo a, point 24 neitu Ronald Zomuanpuia a mal a, an tlarhnung a phui lo hle. Team ṭha zawk tum turin MSVT tan insiamṭhat a ngai khawp ang.

Hollow coach Samuel Lalthlamuanpuia'n kum hmasa lama a player pawimawh

Vanlalṭhazuala leh R. Lalmuanpuia te Khatla TBL leh Tuikual South laka an chan chungin 'full court pressure' an hmang a, VR4 coach Liansangpuia'n a vuak letna tur ṭha tak a duan lawk avangin Mission Vengthlang an che thei lo.

MSL4-ah VR4 leh Hollow te hi team nem tura ngaih an ni a, player naupang an tam ve ve avangin inrintawkna nei turin mipui puihna an mamawh ang. Naktuk zan hian Hollow hian MSL-a vawi hnih champion tawh Khatla TBL an hmachhawn dawn a, Nilai zanah Republic VR4 leh champion lai Mission Veng Vikings te an inkhel ang.