I League hmahruaitu Neroca

Neroca chuan nimin tlai khan an mikhual Gokulam Kerala FC chu 1-0 in an hneh a, I League table chung berah an awm - hei erawh hriat tel a ṭha, Manipur club hian an hnuai chiaha awm Minerva Punjab aiin match hnihin an khel tam zawk.

Imphal khawpuia inkhelah kum 24 mi Varney Kallon chu player langsar ber a ni a, Liberia international hian minute 43-naah goal awmchhun a khung - he goal luhna kawnga dem tur chu Gokulam keeper Bilal Khan a ni a, a ball man ngheh tawk loh chu Kallon hian a khung.

Gokulam tan Mahmood Al-Ajmi chu player langsar a ni a, mah se Bahrain tana vawi 11 inlan thei midfielder vanneih ni a ni lo - kum 30 mi midfielder hian Neroca woodwork vawi hnih zet a tih per.

Neroca tan Subhash Singh-a'n hun ṭha nei ṭhin mah se Mohun Bagan leh Mumbai City forward hlui hi goal hmaah a 'class' tawk lo a, Manipur club-in an phu tawk goal an khung loh phah.

Hun tawp hnaih lamah Gokulam-in point khat tal hlawhchhuah beiseiin nawr mah se tlarhnungah Neroca an inremphui tawh a, Kerala club-in an mamawh goal an sual chhuak thei lo - hun a tawp a, I League hmahruaitu chu Neroca an ni.

Gokulam tan Mizo tlangval Laldampuia'n inkhel bul ṭan mah se minute kuanaah hliam vangin Kawrtethawveng tlangval hi lakchhuah a ni.