NM Gupta Trophy-ah Mizoram che ṭha

Mizoram chuan 32nd Capt NM Gupta Trophy-ah Assam Regimental Centre, Shillong chu 2-0 in an hneh. Inrinni tlai inkhelah hian Mizoram tan Lalrammawia leh Vanlalbiaa Chhangte ten goal an khung.

Champion lai Mizoram hian an match hmasa berah NF Railway chu 3-2 in an hneh a, vawiin tlai dar 1:30 hian DGAR nen Santindra Mohan Dev Stadium, Silchar-ah an match thumna an khel ang.

Lalsangzuala Hmar kaihhruai Mizoram team hian group B-a team ṭha tura ngaih pahnih NF Railway leh ARC an hneh avangin semifinal an lut tawhah a ngaih theih a, vawiina an hmachhawn tur DGAR hian an match hmasa berah ARC chu 2-0 in an hneh lo.

Mizoram coach Sanga chuan, "ARC kan hneh danah inchhuang tur kan awm lo a, draw game khelh an tum avangin first half-ah phei chuan kan talbuai hle. DGAR kan hmachhawn hunah hian inhliam leh hrem vangin player paruk vel kan thlak a ṭul thei a, match awlsam a ni lo ang," tiin point thum hlawhchhuah tura ṭan a ṭul tur thu a sawi.