AFC barakhaihtu Beautin

Coimbatore-ah Aizawl FC-in Yugo Kobayashi hmangin minute thumna lekah goal hmahruai khung mah se mualneitu Chennai City-in subsitute Antony Beautin hmangin minute 73-naah an sut a, 1-1 in inkhel a tawp. Mizo club hian inelna hrang hrangah match nga chhung chak hmel an hmu tawh lo.

Inrinni tlai inkhel result avang hian AFC tan champion nawn a beiseiawm tawh lo. Paulo Meneses-a hote hian match 11 khelh aṭangin point 16 an hlawh chhuak a, hmahruaitu Minerva Punjab an phak lohna chu point 10 zet a ni a, an hmabak match sarih zinga match nga chu khualmuala khelh tur a ni bawk.

Aizawl FC-in February thlaah match sarih zet an neih avangin tun thla hi a harsa dawn tih I League fixture chhuahtirh aṭanga hriat sa a ni a, AFC Champions League khela an zinchhuah bawk avangin an hmabak khirh sa hi a harsat belh sawt. Kum 2018-ah AFC hian South Indian club bak hneh an la nei lo a, an hneh awmchhun club tho hi an match hnuhnung berah an inhnehtawk pui a ni.

Chennai City nen hian Aizawl FC tan Japanese forward Yugo-a'n goal ban tih perin Andrei Ionescu-a'n crossbar pet per bawk mah se chak an phuna bik a awm lo. South Indian club tan Edwin Sydney Vanspaul-a'n chance ṭha a hlah nual a, hero of the match-a thlan Soosairaj-a'n goal ruakah a khung bik lo.

Aizawl FC hian Goa an pan nghal a, naktuk tlai dar 5:30 hian an hnuai chiaha awm Churchill Brothers nen Tilak Maidan-ah an inhmachhawn ang. Mizo club hian Goan club hi Mizoramah hneh tawh mah se an inthlauhna hi point thum chauh a ni a, Churchill hi hmahruaitu Minerva Punjab hneh zo hlim an nih avangin chetsual theihna tur a ni.