Dan theih City, Sanchez leh goal

Premier League champion tura dinhmuh sawhnghet tawha ngaih Manchester City pawh dah theih an ni tih Burnley-in an entir a, Turf Moor-ah 1-1 in an inhnehtawk. Old Trafford-ah Alexis Sanchez-a'n a vawi khat nan Manchester United kawr hain a vawi khat nan a inlan a, goal khung nghalin Huddersfield 2-0 in an hneh.

Mawhphurtu Sterling?
Man City wing back Danilo-a'n box pawn aṭangin kawh zetin minute 22-naah a pet goal a, Pep Guardiola-a'n tlarhnung lei nana a sum sen dan ngaihtuah chuan chak pui tham ni mah se Burnley an beidawng lo.

Clarets captain Ben Mee-a volley chu City keeper Ederson-a'n ṭha takin a dang a, Man City-in inkhel an thunun nachungin mualneitu hian second half-ah pawh Brazilian keeper puihna an mamawh a, Aaron Lenon pet a dang ṭha hle. Amaherawhchu minute 82-naah Johann Berg Gudmundsson-a'n siphurh sutna goal a khung a, 1-1 in inkhel a tawp.

City hian ball possession 71% zet an chang a, point thum an hlawhchhuah loh chhanah Raheem Sterling-a'n mawh a phur. English forward hian Sergio Aguero siam a khung loh bakah Kyle Walker cross chu goal ruakah yard li lek aṭangin a pet goal lo. Liverpool forward hluiin chance ṭha pahnih a hlah hian 1-0 a ni.

Man City boss Pep Guardiola chuan, " Football a ni a, Raheem-a'n vawi khat a hlah a, thil thleng thei a ni. Kan chance vawi khat hlahna pawh a ni lo a, Raheem chiah hian chance ṭha hi a hlah lo, kan inkhelah hian hetiang hi chu vawi tam tak a thleng a ni," tiin an chak lohna chhan Sterling a mawhpuh duh lo.

United an chak
Jose Mourinho-a'n Tottenham Hotspur an hneh lo a la thutak hle tih lantirin pound maktaduai 89 man Paul Pogba aiah kum 21 mi club academy chhuak Scott McTominay a luhtir a, mahni lama tiluttu English defender Phil Jones phei chu squad-ah dah a ni lo.

Old Trafford-ah United-in goal khung an harsat a, minute 55-naa Romelu Lukaku-a'n goal hmahruai an khung hnuah erawh chak turin harsatna an nei tawh lo. Chilean forward Alexis chu United goal nawrna ber a ni a, Sanchez hian Huddersfield defender Michael Hefele lakah penalty hlawh chhuakin goal-ah a chantir nghal lo mah se a per chu minute 68-naah awlsam takin a khung.

United manager Jose Mourinho chuan, "Bench-a Pogba dah kha inhremna a ni lo a, inhremna a nih dawn chuan team kan nih angin keimah ngei pawh hi hrem ka ngai a ni. Kei chuan kan khelh dan tur milin team ka siksawi maiah ka ngai. Hun awl insiam turin mawlmang taka ball pe kual thei ka duh a, chu chu player naupang zawk Tominay ka luhtir chhan kha a ni. Paul khan khelhna hun a neih hnuah ṭha takin a khel a, khawvel midfielder ṭha ber zinga mi a ni tih rinhlelh tur a awm lo," tiin a insawifiah a, Arsenal aṭanga an lakluh Alexis Sanchez a fak tel bawk.

Inkhelh hma hian February 6, 1958-a Munich airport-a chesual Manchester United player leh staff-te hriatrengna hun hman a ni a, kumin hi a kum 60-na chiah a ni. He chhiat tawhnaah hian mi 23 an thi a, United player pariat leh club official pathum an tel a ni.