Mo Salah ropuina hliahtu referee
Liverpool tan Mohamed Salah-a'n injury time-ah goal ropui khung mah se Egyptian forward hmingṭhatna chu hun pek belh veka referee thutlukna makin a hliahkhuh a, Liverpool leh Tottenham Hotspur 2-2 in an inhnehtawk.
Pathianni zan khan Premier League khel turin Liverpool chuan Tottenham an mikhual a, referee Jon Moss-a'n sawizui theih takin Spurs hnenah penalty vawi hnih a pe - inkhelh zawhah inkhel hmuhnawmna aiin referee thutluknain sawi a hlawh zawk.
Liverpool boss Jurgen Klopp chuan, "Ka lung a awi lo a, mahse enge tih theih ka neih? Eng nge ka hna chu? Chanchinthar siam maw? Hrem tura in barh luh maw? Nge pawisa ka chawi dawn? Ka ngaihdan dik tak ka sawi chuan football khawvel chanchina sum chawi hnem ber ka chawi ang," tiin a lungawi lo hle.
King Salah
Liverpool-in goal khung turin hun an duh rei lo a, minute thumna lekah Anfield-a fan te hlimin an au - Spurs nen an inhmachhawn hmasaka Wembley-a dah 'bo' a awm tawh Mohamed Salah-a'n an bu zawlah a zia a chhuah a, Liverpool hmahruaina goal a khung nghal.
Attacking football khel ṭhin team pahnihin an game pangngai an khel a, inkhel a hmuhnawm takzet - goal dang lut tur erawhin minute 80-na nghah thlen a ngai a, Reds keeper Loris Karius ball hnek chhuah chu substitute Victor Wanyama chuan yard 25 vela hla aṭangin a hlap lut, German keeper-in tih theih a nei lo.
Hun pek belhah Salah ropuina hmuh turin a awm a, Liverpool forward hian Spurs defender hual karah ṭha zeta ball lalutin keeper Hugo Lloris a pet khum a, Anfield thawm chu ring tak a ni - inkhel tawpna erawh a la ni lo.
Penalty chu
Minute 80-naah Wanyama-a'n Spurs si phurh sutna goal a khung a, minute thum hnuah Spurs-in penalty an hlawh chhuak bawk. Harry Kane-a'n offside position aṭangin ball a lalut a, Karius-a'n ball man a tumna lamah a ti tlu - English striker hi a offside bakah a tlu nem deuh niin a lang.
Mahse, referee berin penalty spot a kawh miau avangin Kane a lo pen chhuak a, hei erawh Karius hmingṭhatna belhtu mai a ni - English striker-in a laiah tak a pet a, Karius-a'n harsatna nei loin a dang.
Salah-a'n injury time-a a mimal thawhrah senga goal a khung khan Liverpool boss Jurgen Klopp chu an goal khung lawmin a tlan kual a, German coach hian 'hnehna chan' a lawm tawh ngei niin a inngai - mah se a ring sual a ni.
Kane 100
Hun pek belh chu minute li a ni a, minute lina hman mek a ni - pound maktaduai 75 man Virgil van Dijk-a'n ball petchhuah a tumna lamah Erik Lamela a hmuh avangin a ke khai let mah se Argentine forward ava in 'barh' lut a, referee leh linesman an inrawn hnuah Spurs hi penalty pek an ni.
Penalty hmasa pet goal lo mah se huaisen takin Kane a rawn pen chhuak a, Karius-a'n a dang nawn tawh lo - Kane-a'n Premier League-a a goal 100-na khung nan a hmang a, Anfield-a reh a, Spurs hlimin an lam thung.
Premier League match 141 a khelha goal 100 khung thei Kane chuan, "A vawi hnih nana penalty ka pet hma khan ka zam takzet. Penalty dik tak a ni ngei bawk a, defender khan Lamela kha a ti tlu a ni, " tiin referee lamah a ṭang - Kane hian Premier League-a goal 100 khung tling turin match 124 mamawhtu Alan Shearer chiah match mamawh tlem lamah a tluk lo.
Lawmna tur
Referee thutlukna avangin Liverpool an lawm lo a, Kop tan hlimna tur a vang - mah se hlimna tur an zawng lui dawn a nih erawh chuan an tlarhnungin hma an sawn tih hai rual a ni lo. Spurs lakah Van Dijk hoin an tlarhnung a phui sawt tih a lang a, Karius a khel ṭha bawk.
Chutihrualin Wanyama pet goal-na Karius-a hnek chhuah kha awlsam taka man theih niin a lang a, hun pawimawha an fimkhur tawk loh ṭhinna hri kha Reds hian an la vei reng niin a lang.
Goal nawr kawngah an hmuhnawm ngaiin Liverpool an hmuhnawm a, minute 75-naa James Milner thlak tura Joel Matip tlan luhtir erawh Klopp tihsual niin a lang - tlarhnung laia defender pathum an awm hnuah Reds hi counter attack-ah an innghat a, hei hian Spurs tan chance a siam hnem sawt a, an nawr na sawt.
Lungawi lo Klopp
Liverpool boss Klopp a lungawi thei lo. German coach chuan, "Sawi tur tam tak a awm a, mah se referee thutluknain engkim a thlak danglam avangin hemi chungchang sawi bak hi tih theih ka nei tlem hle. Penalty pahnih kha ka hrethiam thei lo ve ve. A hmasa zawk kha offside a ni a, a pahnihnaah pawh khan referee leh linesman thutlukna tur kha ka hre lawk,"
"Van Dijk khan Lamela a khawih fuh ngei a, mah se nem tak a ni. Lamela khan khawih fuh duhin a zuang lut a ni ber a, Dele Alli kha dive tiin yellow card a pe a, a hnuah inkhel zawng zawnga awm lo berah penalty a pe leh bawk si. Thutlukna mak tak tawng lo ni ila chuan kan chak ngei ang," tiin a lungawi lo hle.
Tottenham manager Mauricio Pochettino ngaihdan erawh a dang thung a, Argentine coach chuan, "Inkhel hmuhnawm tak a ni a, football hmuhnawm lanchhuah tir duh ṭhin team pahnih inkhel hmuh hi chu a nuam a ni. Referee khan huaisen takin thutlukna a siam a, a hunlai khan thutlukna dik tak an siam leh siam loh ka hre lo a, ka ennawn hnuah erawh an ti dik tih ka hria," tiin referee a chhan.