Zaninah futsal knockout round

RFL Plastics MFA Futsal League knockout round chu zanin hian R. Dengṭhuama Multipurpose Hall, Mualpuiah khelh ṭan a ni dawn.

Last 16 hi double leg a khelh tur a ni. Zanin dar 7:00 hian league round-a chak vek Chanmari leh MPL lama an elpui ber ṭhin Dinthar an inkhel ang a, dar 8:30-ah inkhelh thiam veng Chhinga Veng leh Bawng­kawn te an inhmachhawn dawn.

Naktuk hian inkhel pahnih dang a awm ang a; Armed Veng South Vs Saron Veng leh Durtlang Vs Electric Veng te an inkhel ang.

Futsal-ah pawh
MPL tir lam tihngaih­nawmtu chu Dinthar leh Chanmari an ni a, Futsal League-ah pawh anni pahnih bawk an ngaihnawm ang!

Chanmari hian Futsal League-a Dinthar kaipuitu David Laltlansanga chu man neiin an lei chhuak a, Chawnpui tlangval hian a club thar hi goal sarih a khung sak. Chan­mari hian Dinthar tlangval Samuel Laltlanthanga (3 goals) leh Reuben Zosangpuia (3) te an kawl bawk.

Football-a player lang­sar dang Rochhingpuia, Lalrammuanpuia (Apuia) leh Lalbiaknia te an kawl a, Chanmari hi player nei ṭha zawk an ni.

Hetihlai hian Dinthar hi an nep chuang lo a, an captain George MS Dawngliana (12 goals) leh a thlawptu Hualsangzuala (9) ten goal 21 an khung tling tawh.

Chanmari coach Samuel Lal­rinzuala Sailo chuan, "Futsal hi chu a dang daih a, kan la inzir chawp nasa hle a ni. Double leg-a khelh tur ni mah se chak tumin kan khel nghal dawn a, kan theih pawh ka ring a ni," tiin a inrintawk hle.

Dinthar coach K. Lalrintluanga (Mapuia) chuan, "First leg-ah hian Chanmari khelh dan kan zir dawn a, semifinal kan thleng thei tih kan hria," tiin beiseina a neih san thu a sawi.

En châkawm
Chhinga Veng leh Ramhlun South inkhelh hunah tualchhung player ṭha an kat nuk dawn avangin an inkhel hi en tlak viau tura ngaih a ni.

Ramhlun South manager Anggu VL Hnamte chuan, "Chhinga Veng awmna lam group A hi an ṭha lo zawkah kan ngai a, kan group lama parukna pawh hi awm se knockout round hi an luh theih ka ring. Chutihrualin knockout stage chinah chuan chetsual theih a ni," tiin pathumna ni mah se pahnihna aiin a indah sang zawk.

Ramhlun South tana goal 11 khung tawh Malsawmfela'n Police training a zawm avangin match hnuhnung berah pawh a inlan lo. Last 16-ah veteran player Rohmingthanga leh Lalremruata te an pawimawh dawn a, goal khungtu lamah Lalnunmawia (11) chu an hmachhuan tur a ni.

Chhinga Veng hian Ramhlun South tlangval Ronald Lalzikpuia an kawl a, ani hian goal ruk khung tawhin ven ngai tur a ni. MFA buatsaih futsal inelnaa Venghlui champion pui tawhtu C. Lalmuanpuia bakah football lamah pawh theihna sang tak nei Vanlalthanga, C. Beithatlo, Lalrinhlua leh Lalsawmzela te an kawl bawk.

Team enkawltu H. Lal­remruata chuan, "Ṭha zawk tih theih tur an awmin ka hre lo. Khelh ṭhat niah chuan chak thei ve ve kan ni a, inkhel hmuhnawm tak kan lantir theih ka beisei," tiin Vanglaini hrilh.