Mizoramin semifinal an lut

32nd Capt NM Gupta Trophy-ah Mizoram chuan match thum an khelh tawhah hnehna la chang vekin semifinal an lut.

Nimin tlai khan Mizoram hian All Assam Rifles (DGAR) chu 6-0 in an sawp. February 8 hian group match hnuhnung berah Silchar club Arunachal SS an hmachhawn ang a, point an hmuh hrim hrim chuan group hmahruaitu an ni ang.

SM Dev Stadium, Silchar-ah champion lai Mizoram an tlangnel tawh a, DGAR nen pawh hian goal khung an harsat lo.

Mizoram tan MS Dawng-liana leh Lalremruata ten goal hnih ve ve khungin Lalrammawia leh Lalromawia ten goal khat an khung ve bawk a, goal an chhuah lo.

Mizoram coach Lalsangzuala Hmar chuan, "Player inhliam leh hrem vangin kan match hnuhnung ber aṭangin player paruk ngawt kan thlak a, he ti chunga he ti zata kan chak hi kan lawm a ni. Hei bakah inkhelh apiangin position hrang hrang aṭangin goal kan khung zel a, a lawmawm hle a ni," tiin Vanglaini a hrilh.

Lawmthu sawi zuiin Sanga chuan, "Major Sangteii Hrahsel leh Capt. Estheri ten an lirthei hmangin kan player inhliam T. Mawia leh captain Rinchhana te damdawi-inah min hruai a, a ṭul ang apiang min buaipui bawk. Mizoram Synod House caretaker Lalchuangliana leh LO atana kan hman Railway-a hnathawk Lalsangzuala (Valbuanga) te kan chungah an ṭha hle. Silchara Mizo awm ten min ṭawiawm ṭha a, an zarah inti neitu takin Silcharah kan khel thei a ni," tiin Silchara Mizo tlawmngaite zarah ngaih ngam taka Mizoram pawnah an awm theih thu a sawi.