Super Bowl LII-ah Philadelphia chak

Philadelphia Eagles chuan nimin khan New England Patriots chu U.S. Bank Stadium, Minnesota-ah 41-33 in an hneh a, an club history-a a vawi khat nan Super Bowl-ah hnehna an chang.

Super Bowl hi American football season tawp kharna a ni a, tun ṭum hi a vawi 52-na a ni. United States leh Canada-ah inelna dah san pali Major League Baseball (MLB), National Basketball Association (NBA), National Football League (NFL) leh National Hockey League (NHL) te a awm a, American football (NFL) hian ngaihhlut a hlawh ber.

Kum 84-a upa Philadelphia Eagles hi kuminah hian rin kai loh zawk an ni a, quarterback Tom Brady hnuaia khel New England Patriots chu chak tura ngaih an ni. Patriots hi Super Bowl-a inlan ngun ber niin tun hi an vawi 10 inlanna a ni a, hnehna chang se chuan champion ngun ber Pittsburgh Steelers record vawi ruk an nih rual chiah ang.

Amaherawhchu quarterback Nick Foles hoin Philadelphia Eagles-in an barakhaih a, kum 29 mi Foles hian a vawm dik zarah touchdown vawi thum an nei a, MVP-ah thlan a ni. Foles hian regular season match thum chiah a awm tawh tihin inhliam vangin quarterback Carson Wentz a thlak a, Super Bowl-ah hial a team hnehna a chanpui.