Goa-ah chak mamawh Aizawl FC

Aizawl FC-in I League-ah match li chhung chak hmel an hmu tawh lo a, vawiin tlai dar 5:30 hian Tilak Maidan-ah Goan club Churchill Brothers an hmachhawn dawn.

Hun harsa
Aizawl FC-in champion nawn tumin team din mah se match 11 an khelh tawh aṭangin vawi li chauh an chak a, hetiang zat bawk hi an khingpui an inhnehtawk pui bakah vawi thum an chak loh avangin nomawi beisei ngam chi a ni tawh lo.

Mizo club-in season ṭan phat aṭangin harsatna an tawk a, Mizorama tawnhriat nei lo Paulo Meneses lalutin Portuguese coach hian season chanve chhung chu Mizoram Premier League zirchian nan hun a hmang.

Tualchhung football a hriat bel hmain I League an khel leh a, Paulo Meneses hian season tawp thlenga player lut chhuak awm rengna Indian football hi a la hrethiam lo a, season liam taa AFC coach Khalid Jamil-a angin chakna thuruk a la hmu chhuak lo.

Mizo club hian an match hnuhnung pathuma Chennai City, Mohun Bagan leh Neroca te an hmachhawn ṭumin goal an khung hmasa vek a, an hum zawh loh avangin heng inkhel pathuma an point hloh hi point sarih zet a ni.

Portuguese coach Paulo Meneses chuan Rajiv Gandhi Stadium, Mualpuia Mohun Bagan an hneh zawhah champion a harsat tawh thu a sawi a, khualmualah Chennai City lakah point khat chauh an hmuh leh avangin palina nih pawh a awlsam dawn lo.

AFC hian Churchill an hmachhawn zawh hian palinaa awm Mohun Bagan khelh zat vawi 12 an khel chiah ang a, an chak a nih chuan Mariners hi point khat chauhin an pha lo ang.

Churchill ṭha zawk
Aizawl FC hian nikum December 13 khan Churchill Brothers chu Yugo Kobayashi goal hmangin 1-0 in an hneh a, tunah erawh Goan club an dang tawh.

Mizoram an rawn tlawh ṭum hian Churchill-in foreigner pathum Eric Obinna Nwaimo, Peter Omoduemuke leh Osagie Monday te chiah an chhawr a, amaherawhchu an match hnuhnung bera Minerva Punjab an hneh ṭumin foreigner panga Osagie Monday (Nigeria), Bektur Talgat Uulu (Kyrgyszstan), Mechac Koffi (Ivory Coast), Hussein Eldor (Lebanon) leh Dawda Ceesay (Gambia) te bul ṭan tirin bench aṭangin Kalu Ogba (Nigeria) a lut leh bawk.

Tunah chuan Churchill hi an foreigner avangin team dang daih an ni tawh a, an match hnuhnung pangaah vawi li chak thei an ni. Goan club hian an mualah hnehna an chang thei a nih chuan Aizawl FC nen an point hmuh zat a inang chiah dawn a, team pahnihin point thum an mamawh ve ve avangin chak tumin an khel dawn a, inkhel hmuhnawm a beisei theih ang.