Mizoram an chak vek

Khelo India School Games 2018 neih mekah Mizoram mipa football team chuan nimin tlai Kerala chu 5-0 in an sawp a, group match vawi thum an khelhah hnehna chang fai veka Group B hmahruaitu niin semifinal an lut -February 7 tlai dar 3:00 hian Delhi nen semifinal an khel ang.

Nimina inkhelah Mizoram tan striker Lalnunzama'n goal li a thun a, F Lalnuntluanga'n goal khat a khung bawk.

Coach HC Zarzoliana kaihhruai Mizoram team hian group match pathumah West Bengal (5-1), Haryana (2-1) leh Kerala (5-0) in an hneh a, goal 12 thunin goal hnih an chhuah a ni. Semifinal-a an khingpui tur Delhi hi Group A pahnihna an ni thung.

Manager Lalrengpuia chuan, "A tir lamah kan khel a buai a, goal kan thun hnuah erawh kan game a dik a, chance kan hlah mang lo a ni," a ti.

Nikum Khelo India-ah khan Mizoram hian West Bengal hnehin nomawi an lo chawi tawh a; match nga an khelhah hnehna chang vekin, goal riat an khung bakah an goal an venghim tluan thei a ni.