Match 22 tlawm lo Barcelona

Barcelona chuan La Liga season kal laiah match 22 khel tawhin chak loh an la nei lo a, club record thar an siam. Pathianni zan inkhelah Barca hian hun tawp dawna Gerard Pique-a goal hmangin Espanyol chu 1-1 in an inhnehtawkpui a ni.

Pep Guardiola kaihhruaina hnuaiah Barcelona hian 2009-10 season khan, season tir lama an match hmasa 21 chhung chu chak loh an nei lo a, he an record ṭha tak hi Ernesto Valverde enkawlna hnuaiah record duhawm zawkin an ziah hnan ta rih.

Pique goal
RCDE Stadium-ah Lionel Messi chu bench lamah hahchawlhtir a ni a, tun season league match bika inkhel bul a ṭan loh vawi khatna a ni. Liverpool aṭanga an lak thar Philippe Coutinho chuan inkhel bul ṭan thungin, Brazil international hian goal bar a pet per.

Barcelona striker Luis Suarez-a'n hlauhawm takin freekick pet mah se goal chhungah a kal lo a, goal an neih mai loh avangin minute 59-naah Messi dah luh a ni. Argentina captain hian beisei angin inkhel a thlak danglam nghal thei bik lo.

Khelmual chhungah tui a tling hnem a, leiah ball inpek kual a harsat avangin Barcelona an chungnung hleithei bik lo. Minute 66-naah Espanyol tan Gerard Moreno chuan tauh lutin hma an hruai a, point thum an hmu tlang ngei dawn ni pawhin a lang hman.

Amaherawhchu, chak loh duh lo Barcelona-in an nawr chhunzawm zel, Barca captain Andres Iniesta-a'n a hun ṭha neih a chhawr ṭangkai thei lo a, tun season chhunga a vawi khat nan an tlawm dawn niin a lang hman. Mahse, hun tawp hma minute riat chiah a awm tawh tihah, defender Pique-a'n Messi siamsak chu tauh lutin an si phurh a sut a, goal dang a lut zui tawh lo.

Valverde a lawm
Barcelona coach Ernesto Valverde chuan hnehna chang zo lo mah se an dinhmun thlirin an tan point khat hawh chhuah chu a ṭha tih a sawi. Catalan club hi anmahni hnaih bertu Atletico Madrid aiin point kuain an la sang zawk mek a ni.

Kum 53 mi Valverde chuan, "Thil engkim mai kha kan tan chuan a harsa vek a ni. Half time hman a nih hnu khan khelmual kha a ziaawm ka beisei a, mah se a hma aiin a hlauhawm zawk," tiin khelmual chhunga tui tling nasa a sawi.

Valverde chuan sawi zawmin, "Kan ruahmanna leh duhdan zawng zawng thlak a ngai a, a kangin ball inpek a ngaih avangin a awlsam lo hle. Long ball kan pet tam a, goal kan phurh hnuah Pique-a'n a tauh lut hlauh kha kan vannei hle," a ti.

Atletico an chak
Pathianni zan inkhel dangah table-a pahnihna Atletico Madrid chuan second half-a forward Angel Correa goal khung hmangin an elpui Valencia chu si khat faiin an hneh a, an chunga awm Barcelona nen an inthlauhna an ti zim sawt.

Atletico Madrid coach Diego Simeone chuan, "Spanish club ṭha berte zinga mi nen kan inkhel a, hetiang result hi kan duh leh beisei chu a ni. Stefan Savic leh Diego Godin ten hliam an nei a, chuti chungin Koke leh Saul Niguez te an khel ṭha a, kan mamawh goal kan neih theih avangin a lawmawm hle," tiin a sawi.

Champion lai Real Madrid-in Inrinni zanah Levante lakah chak ni hmel an hmu zo lo a, Zinedine Zidane-a naute leh Catalan club lian inkarah point 19 zet a awm tawh. Chhiarkawp dan chuan Real hian an nomawi an la hum thei a, mah se hetiang thil chu a thlen a rinawm tawh loh.