Watford hmaah Chelsea an zawr!

Premier League champion Chelsea-in Thawhṭanni zanah goal li an chhuah a, goal li khungtu hi Watford an ni! Chel­sea tan nomawi chawi aiin Champions League khelh phak leh phak loh chu thlir tur a ni tawh zawk a, Vicarage Road-ah Blues hi 4-1 a an chak loh avangin Antonio Conte dinhmun him lo sa a him loh belh bawk.

Watford tan Barcelona aṭanga loan-a an hawh Gerard Deu­lofeu chu player langsar a ni nghal a, Everton forward hlui hian penalty a hlawh chhuak a, goal khat a khung bawk.

Champions League last 16-a Barcelona hmachhawn tur Chel­sea-in an ngam loh player hi Ca­ta­lan club tana khel phak lo a ni.

Hetihrual hian Blues-in chhuan­lam tur an zawng a nih chuan chhuanlam tur an nei - mid­fielder Tiemoue Bakayoko chu minute 30-naah a yellow card pahnihna a hmuh avangin hnawhchhuah a ni a, Chelsea goal chhuah pali hi France international hnawhchhuah a nih hnua lut vek a ni.

Blues veltu Deulofeu
Minute 42-naah Watford-in penalty an hlawh chhuak a, penalty hlawhtu hi Deulofeu a ni - Spanish forward hi keeper Thibaut Courtois nena ball an inchuhna lamah a tlu awlsam deuh hlek niin lang mah se referee berin penalty a pe miau a, Troy Deeney chuan Blues bara­khaihna goal ni turin a khung.

Goal dang lut loin inkhel a tawp dawn niin a lang hman - mah se minute 82-naah Blues tan Eden Hazard chuan an si phurh sutna goal yard 25 vela hla aṭangin a khung a, an hlim chhung erawh rei lo tak a ni.

Minute hnih a liam a, goal an chhuah ve lehnghal. Daryl Janmaat chuan mawi zeta ball a lak kual hnuah Roberto Pereyra nen an in one-two a, Blues defender rual a bum hnuah goal a khung. Watford an phur tawlh tawlh - Deulofeu chuan a mimal thawhrah sengin an goal thumna a khung a, injury time-a Janmaat-a'n a goal hnihna a khung meuh chuan chak tur a chiang tawh.

Champion to Zero
Chelsea khelh dan enin season hmasaa Premier League champion an ni tih awih a harsa a, November hnua match 12 an khelh aṭanga point ruk chiah hmu thei Watford laka an khelh dan en chuan Blues hian Champions League khelh pawh an phu lo!

Premier League champion hian Watford goal zawnah vawi thum chiah an pet thei a, an shot neih ho hi hun tawp hnaih lam minute 10-a an neih vek a ni. Bakayoko hnawhchhuah a nih avangin Conte-a'n Willian a la chhuak a, Cesc Fabregas a luhtir. Spanish midfielder hian a hun ṭha neih goal-ah erawh a chantir thei lo thung.

Hnungzang na avangin Alvaro Morata a la inlan thei lo a, Conte-a'n Hazard chu false nine angin a hman phah. Minute 64-naah Olivier Giroud chu Blues tana a match hmasa ber khel turin luhtir a ni a, Arsenal striker hlui hian a chance neih vawi hnih a chhawr lo.

Blues chhiatna Bakayoko?
Bakayoko red card avanga chak loah Chelsea an inngai mai thei a, mah se Bournemouth laka 3-0 a an tlawm ṭuma a chet­sual avanga Cherries hnena goal khat 'khilai' tu midfielder hi hnawhchhuah a nih hma hauhin a chesual hnem hman hle - Watford tan vawi li ngawt chance a siamsak hman.

France international tihsual vang hian Deeney, Richarlison, Doucoure leh Jose Holebas ten chance duhawm an nei vek a, goalkeeper Courtois kher ni lo se Blues hian goal tam zawk chhuah thei an ni.

Bakayoko-a'n yellow card vawi hnih a hlawhchhuah chhan pawh ama tihsual bawk a ni - Etienne Capoue laka ball a hloh hnua lak let a tumna lamah Capoue hi a pawt thlu a, minute nga hnuah tisual nawn lehin Richarlison lakah a foul leh bawk. Khelmuala hun a hman chhungin vawi 28 ball a khawih a, vawi sarih a hloh. Vawi 12 ngawt pass a nei a, vawi li a hlawhchham!

Conte a him lo
Chelsea-in Watford an hma­chhawn hma an match hnuhnung berah 3-0 ngawtin Bournemouth an ngam lo tawh a, Hornets (Watford sawina) an lenchilh hmain Conte-a'n club chu a lama an ṭan tlat thu thuchhuah siam tura a duh thu a sawi tawh!

Mahse, tunah Watford an ngam lo a, manager ban lama mikhual lo tak Blues hi Italian manager lamah an la ṭang reng em a hriat loh. Conte chuan, "Manager ka la ni reng a, engmah buaina tur a awm lo. Hna ṭha tak thawh tumin ka theihna zawng zawng ka pe a, hei hi a tawk zo lo a nih chuan thutlukna chu club kutah a innghat," a ti.

Conte chuan inkhel thlir nghalin, "Hetiang result-ah chuan coach thiam loh a ni tih a chiang a, starting XI ka thlan dan kawngah thutlukna ka siam sual pawh a ni mahna," tiin an chak loh chu a thiam loh a nih thu a sawi.