Zaninah Mission Veng Vs Republic

Mizoram Super League season linaah kai thar Republic VR4-in zanin dar 7:30 hian champion lai Mission Veng Vikings lakah fiahna hautak zawk an hmachhawn dawn. Hawla Indoor Stadium-a inkhel en man hi Rs 50 a ni a, basketball ngainatute leh veng hmangaihtute an kalkhawm ang.

Republic hian an match hmasa berah Mission Vengthlang Hollow an hneh a, harsatna an tawk lo. Hemi ṭum hian VR4 coach Liansangpuia'n game plan a nei ṭha a, champion lai Vikings hmaah erawh an chak theihna kawng a inhawng zim hle.

Chutihrualin Mission Veng hian Zarkawt BCA lakah Lalrina Renthlei an chán a, an champion ṭuma player pawimawh dang Ronald March an la chhawr thei lo bawk. American player ṭha March-a hi chu awm se VR4 tan dan rual an ni lo a, chuvangin zanin hi Republic Veng tan hun ṭha a ni a, mipui puihna nen champion lai hneh theih dan a awm.

VR4 tana fixture fuh a nih rualin Mission Veng tan pawh hnualna tur a awm lo a, March-a a awm hmaa team ném zawk an hmachhawn hi duhthusam ang hiala sawi theih a ni.

Vikings hian Moses Zoremmawia, Michael F. Lalawmpuia leh Vanlalnunpuia Varte te an la kawl a, MSL ṭan hmain Mizoram aiawha an chhuah bawk avangin inrintawkna an ngah lai tak a ni bawk.

Mission Veng coach Lalhruaitluanga chuan, "VR4 aiin MSL-ah tawn­hriat kan nei ṭha zawk a, fimkhur taka kan khelh chuan hnehna kan chan ngei ka ring," tiin a inringtawk hle.

Republic Veng leh Mis­sion Veng ten ṭantu an nei ṭha a, hei hian zanin inkhel hi a tihmuhnawm sawt ang.