Minerva tan Neroca lehpelhna hun tha
I League-ah champion nomawi chawi tur a la chiang lo–hmahruaitu Neroca chungnunna chu point khat chiah a ni a, an hnuaia awm Minerva Punjab-in match hnihin an khel tlem zawk bawk.
Vawiin chawhnu dar 2:00-ah Minerva hian Shillong Lajong an mikhual dawn a, hnehna an chang a nih chuan Neroca an tlanpel lehnghal ang–an chak zo lo a nih erawh chuan champion kalkawng a inhawng zau sawt dawn tihna a ni.
Tlai dar 5:30-ah Mohun Bagan an inlan dawn bawk a, Kolkata club hian champion beiseina nei ngam tawh lo mah se an hmingṭhatna humhim turin an khel ang–an lenchilh tur hi Chennai City an ni a, South Indian club tan I League-a inhamtang turin chak a pawimawh dawn.
Minerva fiahna hun
Punjab club-in season duhawm tak an hman mek laiin season chawhnu lamah an chesual a, an match hnuhnung pahnihah chak hmel an hmu lo–East Bengal chu khualmualah an inhnehtawkpui a, Churchill Brothers chu rin loh takin 2-1 in an ngam lo leh bawk.
Minerva-in vawiinah an mualah insiamṭhatna hun ṭha an nei dawn a, Punjab club hian an khelmualah match li khel tawhin tlawm hmel an la hmu lo a, match hmasa bera Mohun Bagan an inhnehtawkpui hnuah hnehna an chang vek - vawiinah erawh khelmual thar Tau Devi Lal Stadium-ah Lajong an mikhual ang.
Ṭum dang ang bawkin William Opoku leh Chencho Gyeltshen te chu player pawimawh an ni leh dawn tih a chiang a, player pahnih hi vawiina Minerva chet ṭhat chhan an ni–Indian football a luhchilh dawn tirha 'Bhutan football' dinhmun thlir chunga East Bengal leh Mohun Bagan-in trial pawh an neihtir duh loh Chencho hian Kolkata club pahnih inchhirna thlenin goal ruk a khung tawh a, Middlesbrough midfielder hlui Opoku lah a hmuhnawn zia hrilh nawn kan ngai lo.
Samuela telna Lajong
Shillong Lajong-in captain naupang tak an nei a, a hming chu Samuel Lalmuanpuia a ni. Mohun Bagan coach Shankarlal Chakraborty chuan, "Samuel Lalmuanpuia hi ka hriat ve chinah chuan India-a set piece pet thiam ber a ni," tiin a fak a, Zemabawk North tlangval freekick petah Minerva an fimkhur a ṭul dawn tihna a ni.
Meghalaya club hian Neroca an hneh hnuah an match hnuhnung pahnihah an tlawm a, goal ruk an chhuah. Samuel chuan, "League hautak em em a nih avangin tun aia ṭha zawka kan khelh a ṭul a ni. Match tina point thum hlawhchhuah zel kan duh a, chumi tur chuan tun aia rim zawka thawk chunga kan chance neih kan chhawr a ngai a ni," a ti–Lajong hian an match hnuhnung berah 3-0 ngawtin Bagan an ngam lo.
Lajong tan Samuel-a bakah Yemen tana vawi 25 inlan tawh Aiman Al-Hagri, Nigerian defensive midfielder Daniel Odafin, Equatorial Guinea international Lawrence Doe leh Ivorian striker Abdoulaye Koffi te chu player pawimawh an ni leh dawn a, Minerva tan inthlahdah a thiang bik lo ang.
Chennai-ah Bagan
Tlai dar 5:30-ah Chennai City chuan Mohun Bagan an mikhual dawn a, Kolkata club hi chak chiang saa dah ngawt theih an ni bik lo–an intawn hmasakin Chennai hian Kolkata khawpuiah 2-1 in hnehna an chang a, a hunlaia Bagan coach Sanjoy Sen-a'n banna a thehluh phah hial.
Hetihrual hian Bagan an hneh hnuah Chennai hian match ruk an khelh aṭangin point li chiah an la hlawh chhuak a, an match hnuhnung berah Aizawl FC chu goal khat ve ve khungin an inhnehtawkpui thung–Bagan lakah hnehna chan tumin an khel ang.
South Indian club tan tlarhmaah French striker Jean Joachim, Michael Soosairaj leh Edwin Vanspaul te chu innghahna tur an ni ang a, Bagan lamah Lebanon international Akram Moghrabi, Cameron Watson, Yuta Kinowaki leh goal riat khung tawh Aser Dipanda Dicka te chu ven uluk tur an ni.