FA Cup Replay : Tottenham Vs Newport County

Premier League club Tottenham Hotspur chuan FA Cup fourth round-ah Newport County chu Rodney Parade-ah an hneh thei lo a, zanin dar 1:15 hian Wembley Stadium-ah League Two club nen hian replay an khel ang.

Spurs hian hnehna an chang a nih chuan fifth round-ah Millwall leh Rochdale te inkhela chak zawk an hmachhawn dawn a, FA Cup replay dang pathum chu nizan khan khelh niin result kan hre hman lo.

Moura inlan hun?
Tottenham chuan Paris St-Germain winger Lucas Moura chu pound maktaduai 23-in January transfer tawp niah an lalut a, Brazilian winger hi Spurs-in Wembley Stadium-a Manchester United an hneh hmain an pho chhuak.

Kum 25 mi Moura hi Liverpool leh Spurs inhnehtawk ṭumin a inlan lo a, FA Cup hi a inlan ṭan hun tura ngaih a ni a. Chutihrualin Mauricio Pochettino chuan an player thar chu a duhsak bik loh tur thu a sawi tawh.

Argentine manger Pochettino chuan, "Lucas Moura a nih vang emaw Paris Saint-Germain aṭanga lo kal a nih avangin khelhna hmun a chang nghal dawn lo. Player dang aiin a ṭha zawk tih a lantir a ngai. PSG-ah Neymar an la thar a, midang aia a ṭhat zawk avangin a khel nghal a, a dik thlap a ni," tiin an player thar chungchang a sawi.

Moura hian player ṭha dang Erik Lamela, Heung-min Son leh Christian Eriksen te el pui tur a nei a, Liverpool nena match pawimawh takah chuan rin a la hlawh lo. FA Cup replay an muala an khelh dawn avangin Pochettino tan player ṭhenkhat hahchawlhtirna ṭha tak a ni dawn a, Moura chhawr theihna hun ṭha a ni bawk ang.

Hei erawh hriat tel a ṭha, Poch hi Newport nen an inkhelh hmasak ṭumin a player-te khelhdan leh rilru put hmangah a lawm lo a, FA Cup a lak thu tak avangin chak thei tur team a luhtir ang.

Kane leh goal
Spurs tan Harry Kane chu player pawimawh a ni a, English forward hian Newport a hmachhawn lo a nih pawhin a ṭhat tawk loh vang ni loin an hahchawlhtir vang a ni thei ang.

Kum 24 mi Kane hian Liverpool lakah Premier League-a a goal 100-na a khung a, London club tana league goal hmasa ber chu April 2014 khan Sunderland lamah a khung. Mellung phun tur hian Kane hian match 138 a mamawh a, Spurs player zingah goal 100 khung thei pakuana a ni.

Kane hian club legend zinga mi Jimmy Greaves erawh a tluk lo. Greaves hian league-ah Spurs tan match 321-ah goal 220 a khung a, goal 100 khung tling tur pawhin match 113 chiah a mamawh. Chutihrualin Premier League ṭan hnuah erawh Kane hi Spurs tan a ropui ber a, goal 100 khung tling thei awmchhun a la ni. Tuna khel laia amah hnaihtu Christian Eriksen (38 goals), Dele Alli (33) leh Heung-Min Son (26) te an ni a, heng player lakah chuan Kane hi a la fal hle.

Hmabak hautak
Tottenham hian Manchester United an hneh hnuah Liverpool an hmachhawn leh a, Newport nen replay an khelh avangin inkhelh tur an ngah sawt.

Pochettino hote hian tun Inrinni zan dar 6:00 hian North London derby-ah transfer-a che ṭhat vanga phur thar Arsenal an hmachhawn dawn a, Thawhlehni zanah Italian champion Juventus hmachhawn turin an zin chhuak dawn.

Kar khat chhung lekin inelna hrang pathumah match pawimawh pathum an khel dawn a, Argentine manager Poch tan uluk taka player siksawi a ṭul ang.