PyeongChang 2018 Olympic Winter Games

Infiammite intawhkhawmna lian zinga pakhat Winter Olympic Games 2018 chu February 9-25 chhung hian South Korea-ah neih a ni dawn. Inelna hi PyeongChang khawpuiah neih tur niin, PyeongChang 2018 Olympic Winter Games tia sawi a ni.

Winter Olympic thlen tum hian Pyeong-Chang bakah German khawpui Berlin, France khawpui pakhat Annecy ten dilna an siam a, kum 2011 July thla khan International Olympic Committee (IOC) chuan Korea-in an thlen tur thu hi an tichiang.

South Korea hian kum 1988 khan Seoul-ah Summer Olympic Games an thleng tawh a, Winter Olympic bik hi chu an vawi khat thlena tur a ni ang. Ram paruk - Ecuador, Eritrea, Kosovo, Malaysia, Nigeria leh Singapore te chu an vawi khat inlanna tur a ni ve bawk.

Kuminah hian inelna chi hrang 15 hnuaiah medal 102 sem chhuah tura ruahman a ni a, medal sem hnem ber ṭum a ni ang. Kum dang ang bawkin United States chuan infiammi a tir hnem leh dawn, US hian athlete 242 tirin anni aia kaltir hnem an awm lo.

US hnungah hian Canada chuan 225 a nei bawk a, che ṭha tura ngaih Germany chuan infiammi 153 a tir dawn. Inelna thlengtu South Korea hian 146 an nei thung ang. India chuan ṭum dang ang bawkin athlete a nei tlem leh, Jagdish Singh (Cross-country skiing) leh Shiva Keshavan (Luge) te chiahin Korea an pan a ni.

Russia Buaina
Russia buaina sawi dawn chuan 2014 Winter Olympic aṭanga sawi ṭan a ngai. Russia-in an khawpui pakhat Sochi-ah he games hi an thleng a, gold 11 lain an champion.

Amaherawhchu, Russia hian rinhlelh a kai. Nikum khan infiammi ten damdawi hman phal loh an hman leh hman loh chungchangah dan an bawhchhiah em tih chhuitu lian ber World Anti-Doping Agency (WADA) chuan a chhui chiang turin group a din.

WADA hnuaia Russia zirchhiangtu pawl hi dan hre mi Richard McLaren-a'n a kaihhruai a, kum 2016 August thla khan an thil chhuichhuah chu khawvel hriat atan an puang a, inelna lian Rio Olympic hma deuha puan a nih avangin a nghawng a lian lehzual.

Zirchianna aṭanga a lan dan chuan, kum 2011-2015 chhung khan Russian infiammi 1,000 chuang zet chuan an ram sorkar hriatpuina hnuaiah dan an bawhchhia tih hmuhchhuah a ni.

International Athletic Federation chuan, athletic huang bikah chuan Russian infiammite hi an inlan a phal lo nghal bur; Olympic-ah pawh an inlan theih loh nana hma la turin International Olympic Committee (IOC) chu a ngen zui hial a ni.

Amaherawhchu, IOC hian Russia lakah zahngaihna a lantir a, Olympic neih dawnah hian dan leh hrai zam tharin, chumi zawm famkim theite chu an inlan an phal sak. Mahse, heng infiammi dan bawhchhe lote pawh hi Russia aiawhin an inlan thei lo a, neutral athlete ni chungin an inlan.

Neutral athlete kan tihte hi Olympic puanzar hnuaiah an inlan a, medal an lak pawhin an ram tan ni loin an mahni mimal tan a ni, medal an lak laia hnam hla tih rik aiah Olympic hla tih rik sak an ni ang.

Nikum December thla khan IOC chuan tun Winter Olympic-ah pawh hian Russia hremna hi a kengkawh tlang dawn tih a puang tawh. Mahse, Rio Olympic lama a tih tawh angin dan leh hrai zawm famkim leh, endik nawn an nih hnua fihlimte chu kumin Winter Olympic-ah inlan an phalsak tho ang.

Korea ram pahnih
Kumin January thlatir khan North Korea official pakhat chuan Winter Games-ah hian an tel ve tur thu a sawi a, hemi hnu lawkah an ṭhenawm ram South Korea nena inbiakna neih an duh thu a sawi zui bawk.

Tun laia ram inhal tak Korea ram pahnihten inbiakna an neih hi US President Donald Trump chuan a lawmpui thu a sawi chhuak a, a thlawp thu a sawi bawk.

Korea ram pahnihte hian inbiakna an nei a, opening ceremony neih hunah pawh hnam puanzar pakhat Korean Unification Flag hnuaia kal dun turin thutlukna an siam tawh a, kum 70 vel chhung an boruak ṭha tawh lo siam ṭhat nana hmalakna a ni. North Korea chuan open ceremony hi ngai pawimawhin cheerleaders 100 rual a kaltir dawn a, rimawi tum thiam 100 chuangin an belh ang.

Korea hming puin ram pahnih hian hmeichhe ice hockey team khat an tir dawn. Infiamna hmanga ram pahnih inkar siam ṭhat an tumna hi South Korea media lam chuan 'medal pakhat' chan theihna tihin an thendarh a, North Korea lam lungawi loin kar hmasa lama joint cultural event neih an tum pawh an ṭulh.

Amaherawhchu ram pahnih aiawhin hmeichhe ice hockey team khat hi kaltlang pui a ni dawn tho a, January 5 khan Olympic atana inpuahchahna hmasa berah Sweden chu 3-1 in an hneh lo. Ram pahnih mipuiin team khat an ṭan dun theih chuan an buaina siam ṭhatna kawngah pawh nghawng a neih theih beisei a ni a, tun hnaiah buaina thar awm loin inpawh tlang takin inelna an hmachhawn chho thei tura ngaih a ni.