Rafael Nadal a dam hnai

World number 1 Rafael Nadal chuan a ke hliam a dam chhoh mek thu a sawi a, ranking vawng him tura a beih let leh theih ngei a beisei thu a sawi bawk.

Kum 31 mi Nadal hi Australian Open quarter-final-ah khan Marin Cilic nen an intawng a, set ngana an khelh laiin a ke hliam vangin a khel zui thei tawh lo. Hard court inelna lian a zawh hnuah match a la khel leh lo a, February 26 aṭanga khelh ṭan tur Mexican Open-ah inlan thei tura beisei a ni.

Grand Slam vawi 16 champion tawh Nadal chuan, "Hun harsa leh hautak ka paltlang fo tawh a, hun nuam leh hlimawm tawn chang pawh a awm ve bawk. Tunah hian ka dinhmun a chhe ta duai tihna a ni bik lo a, chutih rualin hliam nei tlem deuh tur chuan kan khelh dan phung ngaihtuah nawn pawh a ṭulin ka hria," a ti.

Spain tlangval chuan sawi zawmin, "Player naupang zawkte pawhin keini aiin hliam chungchangah buaina an tawk hnem zawk niin a hriat a, kan kum leh dinhmun ngaihtuah chungin tournament khelh tur kan thlan thiam a pawimawh hle a ni," a ti.

Nikum khan Mexican Open-ah Nadal hi pahnihna a ni a, kuminah hian a inlan lo a, tournament dangah Roger Federer a inlan a nih si chuan ranking an inthlak thei dawn - Nadal hian clay court season ṭan hma ngeiin harsatna nei loa khelh theih a beisei a ni.