Athletics World Cup thleng tur London

Kumin nipui lai hian Athletics ram ṭha pariat inelna tur Athletics World Cup chu a vawi khat nan neih a ni dawn a, July thla tawpa neih tur inelna hi London chuan a thleng dawn a ni.

Inelnaah hian Britain, United States, South Africa, Poland, France, China, Germany leh Jamaica te an inlan dawn a, ram pakhat aṭangin mipa leh hmeichhe infiammi an kal khawm ang - inelna hi 1500m intlansiak thleng neih tur a ni ang.

Nipuiah FIFA World Cup neih a ni dawn a, July thla tawp hian Wimbledon final khelh a ni dawn bawk. Infiamna langsar pahnih hmawr bawk dawn laia Athletics World Cup thlen hi thil châkawm tak a ni lo ang.

UK Athletics chief executive Niels de Vo chuan, "Mitinin mahni ram tana inlan an duh a, a bik takin medal dawn kan chak vek. Ram tana tha thawhtute hi engtik lai mahnin ngaihthah an ni ngai lo, kuminah pawh hian ni hnih kan neih chhung hian a tlem berah mipui 55,000 zel an punkhawm kan beisei," tiin World Cup leh Wimbledon neih laia neih tur ni mah se entu an tam tho tur thu a sawi.