Guwahati-ah Pune an zin

Indian Super League inkhel pakhat zaninah a awm dawn a, NorthEast United chuan Pune City an mikhual ang–Guwahati khawpuia team pahnih inhmachhawn hun tur hi zan dar 8:00-ah a ni.

Highlanders-in Cham-pions League final-a Chelsea hruai thleng theitu Avram Grant enkawlna hnuaiah harhtharna an chang mek a, an match hnuhnung pathum aṭangin point li an hmu thei.

Avram Grant chuan, "Ka naute hi player ṭha tak tak vek an ni a, vanduaithlak takin league bul kan ṭan fuh lo a ni. A bul ṭantir aṭangin he hmunah hian ka awm lo a, tuna kan tih tur chu kan point hloh tawhte nei let tura theihtawp chhuah a ni. Kan match hnuhnung pangaah vawi hnih chiah kan tlawm a, tun ang hian bul lo ṭan ni ila chu tunah hian top four-ah kan awm mek ang," a ti.

West Ham leh Ghana boss hlui ni bawkin top four chungchang a sawi a, Highlanders mang ram hi tuna Pune City dinhmun a ni–Maharashtra club hi table-ah pathumna ni mekin season tawp lama semifinal khelh an duh dawn miau avangin zaninah chak an tum ang.

Avram Grant-a hnuaiah Robert Lalthlamuana'n hmun pawimawh a chang leh tawh a, Lalrindika Ralte chu hliam tenau vanga a buai hnuah match hnuhnung berah FC Goa a hmachhawn leh tawh a, Mizo tlangval pahnih hi zaninah an hmel hmuh a beiseiawm.

Pune City lamah Isaac Vanmalsawma leh Lalchhuanmawia Fanai an awm a, mah se Mizo tlangval pahnih hi an match hnuhnung bera 1-2 a Kerala Blasters an ngam loh ṭumin an inlan lo.